Kanus-a kaha kita dili na magpasugo?

Ika-30 nga Domingo sa Ordinaryong Panahon (October 25, 2020)
Ex. 22:20-26 / Sal. 18 / 1 Thes. 1:5-10 / Mt. 22:34-40

Tataw kaayo nga alang kang Kristo ang pinakadakong sugo mao ang paghigugma sa Dios ug ang paghigugma sa isigkatawo sama sa atong kaugalingon. Apan pagkaanindot kaha kung dili na nato bation nga bug-at nga sugo ang paghimo niini. Nindot kung ang paghigugma sa Dios ug sa atong isigkatawo mahimo na lamang natural ug ikalipay nga bahin atong pagpuyo.

Kining pandemya, dakong kahigayonan nga mapadayag nato ang maong matang sa gugma. Ang gugma nga dili mamolitika, ang gugma nga dili maghulat og balos, ang gugma nga molantaw sa pagtabang ug dili aron pasidunggan.

Kini mapadayag sa mga nibati nga sila langyaw tungod kay sila napalayo tungod kay positibo sila sa COVID-19. Kini mapakita usab diha sa dili pagdaog-daog sa mga ilo ug biyuda, sa mga naglisod tungod sa krisis karon. Kini mapabati nato sa mga angay pahulamon tungod kay wala silay makaon ug kapaninguhaan sa pagkakaron. Kini mabuhat diha sa paglikay sa kasuko ug pagpabilin nga bugnaw sa ulo aron dili madugangan ang kabug-at sa palibot.

Kining maong gugma masaksihan diha sa katilingban nga bisan sa kalisod, malipayon ug mapasalamaton sa pulong sa Ginoo nga maoy naglig-on sa matag usa. Niining dakong pagsulay sa tibuok katawhan sa kalibotan karon, dako ang hagit nga kita mamahimong maoy kadasig sa uban, kadasig nga dala sa atong pagtoo nga ang Ginoo dili gayod mobiya kanato. Kining maong panglantaw sa kinabuhi puno sa paglaum kanunay nga kabahin lamang kining pagsulay alang sa umaabot nga dakong kaluwasan ug kalingkawasan.

Bisan unsa kabug-at sa pagsulay kon kini atubangon nato sa gugma, mamahimo kining makaya. Bisan unsa ka lisod ang kahimtang, kung ang matag usa mopakitag gugma, walay imposible nga dili masulbad ang suliran. Kung ang matag usa mobuhat niini dili tungod kay siya napugos nga gisugo apan giangkon niya nga mao kini gayod ang angay ug tinubdan sa kalipay, tinuod na gayod nga gugma maoy nagtukmod kaniya. Kanus-a pa gayod kaha nga dila na kita magpasugo aron sa paghigugma?