Bagobo-Klata 15th Tribal Festival: Panagduyog-ambitay, Panaghiusa, ug Pagmisyon uban sa mga Katawhang Lumad

Gipahigayon sa Bagobo-Klata Tribe ang ilang 15th Tribal Festival niadtong Oktobre 11, 2020 sa Sirib Tribal Center, Calinan Davao City atol sa pagsaulog sa Indigenous People’s Sunday nga ginasaulog matag ikaduhang Dominggo sa bulan sa Oktobre.

Kahibaloan nga ning kasamtangang tuig mao ang Year of Ecumenism, Indigenous Peoples, and Interreligious Dialogue nga may temang “Dialogue, Communion, and Mission with the Indigenous Peoples”.

Gisugdan ang maong selebrasyon pinaagi sa Santos nga Misa pinanguluhan ni Rev. Fr. Mark Jann Perez, OSJ, Kura Paroko sa San Francisco de Asis Parish – Tagakpan.

Sa iyang homiliya, si Fr. Perez naghatag og duot sa importansya sa panagduyog-ambitay, panaghiusa, ug pagmisyon – nga pinaagi niini mapakita sa matag usa ang pag-amping dili lang sa kaugalingong interes, kundi apil usab ang interes sa kadaghanan. Matud niya ang matag usa adunay misyon sa pag-amping sa komunidad, kay pinaagi niini, maampingan usab ang kinaiyahan nga mao’y atong bahandi nga padayon magahatag sa matag usa og kalambuan ug paglaum sa kinabuhi. Ug kini atong pagadal-on sa uban, pinaagi sa atong pakigmisyon uban ang presensya sa Ginoo. Kay kini mao ang gusto sa Ginoo para kanato – ang mahiusa uban Kaniya.

Dugang pa niini, gipahinumdom usab niya ang tanan nga ang pagsunod sa Ginoo dili tungod kay gipugos kita, kung dili tungod sa atong gugma ug pagdayeg alang Kaniya. Ang pagtubag sa imbitasyon sa Ginoo nagpasabot sa paghatag ug pagpakitag dungog ug himaya Kaniya isip atong Ginoo ug Amahan. Kay ang pakighiusa sa Iyang kagustuhan ug ang pagtubag sa Iyang tawag nagpasabot og pakighiusa kaniya.

Ang Santos nga Misa gisundan sa pagpakita og video presentation pinanguluhan sa Philippine Eagle Foundation, Inc. diin gipakita ang kinabuhi sa mga agila nga naghatag og pahimangno sa matag usa sa pag-amping sa kinaiyahan pinaagi sa pagbalik sa kalunhaw kay daghang kinabuhi ang nakasalalay niini ug aron mulungtad pa kini sa mga sunod nga henerasyon.

Ang video presentation gisundan sa pasundayag og sayaw sa maong tribo sa wala pa ang salo-salo. Mapasalamaton si Datu Rosalito Anog kay nahimo ang maong aktibidad nga posible maskin pa man dili tanan nakatambong tungod sa pandemya. Siya nanghinaot sa mga muabutay pang mga festival sa mga katuigan nga muabot alang sa pagpalambo sa mga musunod nga henerasyon. (Rizzel Mae C. Daya | San Francisco de Asis Parish-Tagakpan SocCom)