Bag-ong Kura Paroko sa St. John Paul II Parish gi-instalar

Giinstalar ang bag-ong Kura Paroko sa St. John Paul II Parish nga mao si Fr. Russell Bantiles. Ang pag-instalar gihimo atol sa ika-9 nga pagsaulog sa ilang kapistahan isip parokya niadtong Oktubre 22 ug gipanguluhan kini sa atong halandon nga Arsobispo sa Dabaw si Most. Rev. Romulo G. Valles, DD. Kauban sa arsobispo ang siyam (9) ka mga pari nga bisita nga usab mikonselebrar sa maong misa.

Sa mensahe ni Archbishop Valles nag-ingon siya, “Magpasalamat kita kay Msgr. Matt, naa si Fr. Russell, the priesthood will continue here in your community ug kana timaan sa kaayo sa Ginoo. Niining misa karon mag-ampo kita uban sa pangaliya ni St. John Paul, mag-ampo kita alang kang Msgr. Matt sa dakung pagpasalamat. I will pray for him nakita ninyo karon dili pa lang dugay. Mag-ampo kita sa atong young, I’m sure energetic nga parish priest ug mag-ampo kita alang natong tanan. Magdungan gyud ta kada adlaw nga manghupas ug mangaliya sa Ginoo, moingon sa Ginoo ang yuta puno sa kaayo sa Ginoo.”

Sa katapusan, nalipay ug nagpasalamat si Fr. Russell nga ang maong hagit nga mamahimong kura paroko sa maong parokya usa ka dakong grasya gikan sa Ginoo alang kaniya. Kay ang maong patron St. John Paul II nahimamat kini niya sa personal sa pipila ka mga higayon sa buhi pa kini. Ug ang mga parokyano usab nalipay sa pagdawat sa ilang bag-ong kura paroko pinaagi sa pagpalakpak. (Mary Jane Alba)