Ang Ginoo maloloy-on nga mogiya kanato padulong sa iyang gingharian

Ika-28 nga Domingo sa Ordinaryong Panahon (October 11, 2020)
Is. 25:6-10a / Sal. 23:1-6 / Phil. 4:12-14, 19-20 / Mt. 22:1-14

Nakasinati ka na ba nga gidapit sa kombira ug mibalibad ka? Unsa bay hinungdan nga ikaw nagkulang sa higayon nga mosanong sa imbitasyon?

Nadungog nato sa unang pagbasa, nga ang Ginoo mag-andam alang sa mga Israelita sa kombira diin pahiran niya ang mga luha ug maglipay sila. Kung ang Dios nagpahiluna sa iyang piniling katawhan, siya usab karon maniguro nga mahilayo kita sa kadaot panahon sa krisis. Bisan og mohinay ang atong panginabuhi, ang Dios magpadala kanatog lain-laing pamaagi nga atong mahimo aron kita makalahutay.

Kita mitubag sa salmo nga magpuyo kita sa balay sa Ginoo sa tanang adlaw sa atong kinabuhi. Nakaamgo kita sa mga mas labing bililhong butang panahon niining pandemya. Mas maayo gayod ang pagpalabi sa mga butang nga dili lamang molabay, kondili sa mga butang espirituhanon, sama sa pag-atiman sa atong pamilya ug paghuna-huna usab sa panginahanglan sa uban.

Sa ikaduhang pagbasa, ang Ginoo kanunay nagalig-on kang San Pablo ug naghatag kaniya sa iyang gikinahanglan panahon sa kalisod. Sama kang San Pablo, karon usab nakasinati kita sa kabuhong kaniadto ug sa kapait sa pagkakaron. Apan bisan sa nagkausab-usab nga kahimtang, ang kapait dili maoy kataposan sa tanan. Hinunoa, kini ang higayon diin kita nahimong mas suod sa Ginoo ug kita mosalig dili sa atong mahimo, kondili sa iyang panabang.

Ug sa Ebanghelyo siya nagdapit kanunay nga mosulod kita ug mosalmot sa bangkite sa langit nga atong gisaulog sa Eyukaristiya. Ang tanang higayon, kaabunda man o kanihit, kahayahay man og kaapiki, kining tanan kahigayonan sa pagdapit sa Ginoo nga kita mahinumdom kanunay kaniya. Bisan asa ug bisan kanus-a, ang Dios nag-awhag kanato nga dili siya hikalimtan sa atong mga desisyon ug lakang nga pagahimuon sa atong pagpaningkamot.

Tubagon nato ang pagdapit sa Dios kanato pinaagi sa pagsul-ob sa saktong kinaiya sa matag adlaw natong pagpuyo. Isul-ob ta ang maayong kinaiya sa usa ka Kristiyano pinaagi sa paghimog maayo sa atong isigkatawo.