Pamunga isip piniyalan sa Ginoo

Ika-27 nga Domingo sa Ordinaryong Panahon (October 4, 2020)
Is. 5:1-7 / Salmo 80:9, 12, 13-14, 15-16, 19-20 / Phil. 4:6-9 / Mt. 21:33-43

Walay usa kanato nga tag-iya sa unsay anaa kanato. Ang tanan atong nadawat gikan sa Dios. Busa ang matag usa piniyalan sa Ginoo.

Sa unang pagbasa, napakyas ang katawhan sa Israel sa pagbaton kanunay sa pagsalig sa Dios kanila, tungod kay imbis kanila gitisok ang mahigugmaong pagpili kanila, misangtop man hinuon sila sa pagkatibulaag ug kamatay. Ang nasinati natong krisis nagpakita nga mangamatay gayod kitang tanan kung ang atong kaugalingon lamang ang siguraduhon. Maghuna-huna unta kita kanunay sa kaayohan sa uban.

Ang Salmo nagpasalig nga ang Dios mopabalik sa anihon. Siya moatiman pag-usab sa iyang parasan aron kini mamunga. Molaum kita nga human niining krisis, ang Dios mopabangon kanato. Bisan nag-antus kita karon sa kulang sa kapaninguhaan, sa kalisod sa matag adlaw natong sustiner, mapaubsanon kitang mosalig nga makalatas ra kita gikan niini.

Isip mga piniyalan sa Ginoo, ang ikaduhang pagbasa nagpahimangno kanato nga magpuyo diha sa pasalamat ug walay kabalaka. Hinunoa, ipakita ang maayo ug angay daygon, matuod, hamili, matarong putli, matahom, ug halangdon. Bisan daghan ang nawala kanato, sama sa trabaho, abot, ug kagawasan nga molakaw-lakaw bisan asa, pasalamat kita nga nahiusa kita sa atong pamilya, nga nakaamgo kita sa mas importanteng butang nga angay huptan ug dili ang lumalabay lamang nga mga kalipay.

Ang Ebanghelyo naghatag sa panig-ingnan ni Kristo nga maayong piniyalan. Siya gisalikway apan nagmalahutayon ug makanunayon sa paghimo sa iyang misyon taliwala sa kasakit. Dili unta nato itugot nga mopahimulos sa kalisod sa uban. Dili unta nato angkunon ang dili atoa. Ipaambit unta nato ang unsay gisalig kanato sa Dios kay sayod kita nga ang matag usa piniyalan lamang.

Busa, sanglit wala man kitay dala niadtong natawo kita niining kalibotana, magpasalamat unta kita kanunay sa gasa nga karon gihatag kanato. Atimanon unta nato ang tanan tungod kay kini hinatag man. Mamunga unta kita isip piniyalan sa Ginoo.