Pagpaminaw maoy sinugdanan sa bokasyon

Hagit ni Arsopbispo Romulo G. Valles, Arsobispo sa Davao ug CBCP President nga ang pagpaminaw maoy unang lakang sa pagtubag sa bokasyon.

Kini iyang gisaysay atol sa misa sa paglusad sa Vocation Month niining bulan sa Septembre didto sa kapilya sa St. Francis Xavier Regional Major Seminary, Catalunan Grande, niadtong milabay nga Sabado, Septembre 12.

Gibatbat ni Arsobispo Valles nga sa pagsaulog sa Holy Name of Mary niadtong adlawa, ang mahal nga Birhen Maria ang pinakaimportateng pananglitan sa bokasyon. “Si Maria, naminaw ug padayon nga naminaw sa tawag sa Ginoo sa iyang kinabuhi,” matod pa sa obispo. Sa pagpahibalo kaniya sa anghel sa iyang bokasyon hangtod nga si Kristo gilansang sa krus, ang mahal nga Birhen kanunay naminaw sa kabubot-on sa Ginoo.

“Kung dili kita maminaw, magpataka lang kitag tubag,” kini ang hagit ni Arsobispo Valles sa mga seminarista aron masuta gayod nila ang tawag sa pagkapari.

Gihisgotan usab sa Obispo nga ang nagkalain-laing kongregasyon sa mga relihiyosong pundok sa kaparian, kamadrehan ug mga brothers nisalmot usab sa maong misa. Kini nahimo tungod sa live streaming pinaagi sa DXGN 89.9 Spirit FM.

Tungod sa “new normal” nga atong nasinati karon, kining maong misa nga kasagaran gipahigayon didto sa San Pedro Cathedral. Apan pinasahi kini karong tuiga tungod sa atong kasamtangan nga kahimtang. (DCHerald)