Ipakita ang maayong buhat isip tubag sa iyang tawag

Ika-26 nga Domingo sa Ordinaryong Panahon (September 27, 2020)
Ez. 18:25-28 / Sal. 25:4-9 / Phil. 2:1-11 / Mt. 21:28-32

Niadtong wala pa ang pandemya sa COVID 19 usa sa akong mga higala nga niasenso sa iyang negosyo ug naadunahan na pag-ayo nahilayo sa Ginoo tungod kay nagbisyo siya ug nabungkag ang iyang pamilya. Wala na siya miila sa Ginoo kay ang materyal nga bahandi na ang iyang gisaligan. Apan pag-abot sa pandemya diin halos nahapay siya, didto siya nakaamgo nga posible ang tanan molabay ra kung molihok gayod ang Ginoo. Tungod sa krisis nga iyang nasinati nga halos wala na siya’y nahabilin, mibalik siya sa iyang pamily ug nagsugod pag-usab sa bag-ong kinabuhi nga hinimbahon na kaayo.

Tinuod gayod nga sa unang pagbasa, nadunggan nato nga kung ang usa ka tawong daotan mobiya sa iyang pagkadaotan ug buhaton niya ang husto ug matarong, maluwas siya. Tungod kay siya mibiya man sa tanan niyang sala, maluwas gayod siya.

Giawhag kita nga mabatonan ang kinabuhi nga Kristohanon. Sa ikaduhang pagbasa, gisul-0b ni Hesus ang kinaiya sa usa ka sulugoon. Nagpaubos siya ug nagmasinugtanon hangtod sa kamatayon. Dili ang iyang kaugalingong katagbawan ang iyang gihunahuna kondili ang pagtuman sa kabubot-on sa Amahan.

Mao kini ang gipasabot ni Hesus sa Ebanghelyo, nga kinahanglan magbag-o human kita makaamgo nga nakalapas kita sa Dios. Human nato mabati ang iyang tawag, labina niining panahon sa kalisod sa pandemya, hinaut unta nga kita mobiya sa atong mga daotang buhat ug maningkamot magpabilin bisan sa mga pag-antos nga maghimo kanunay sa angay alang sa uban ug alang sa Ginoo.

Isip usa ka magtotoo nga karon nakadungog sa mensahe sa Ginoo, unsa kahang paagiha nga ako makapakita nga nakaamgo ug nabag-o panahon niining pandemya? Unsaon kaha nako pagpuyo sukad karon ang akong mga nahunahunaan nga usbon sa akong kinabuhi isip tubag sa iyang tawag?