Diha sa pagpsaylo anaa ang kalinaw ug kalipay

Ika-24 nga Domingo sa Ordinaryong Panahon (September 13, 2020)
Sir. 27:30-28:7 / Sal. 103 / Rom. 14:7-9 / Mt. 18:21-35

Dunay estorya sa usa ka tawo nga makapabuhi og patay. Usa ka gabii, ang duha ka patay iyang gipabangon gikan sa ilang panteyon ug giingnan, “sige suroy kamo hangtod alas dose sa tungang gabii ug balik dayon pag-abot sa oras.” Tuod man, ang duha, nanglakaw dayon. Ang usa kanila mibalik singko minutos sa wala pa ang gisabotan nga oras. Apan ang usa naabtan og alas kwatro sa kaadlawon. Sa dihang gipangutanan siya nganong nalangan siya pagbalik, siya mitubag, “gipangita paman gud nako akong higala nga nasilo kanako aron mangayo kog pasaylo ug aron siya akong mapasaylo, kay namatay man gud ko sa COVID ug wala gyud mi nagkaestorya sa wala pa ako mamatay, karon magmalinawon na gyud ko dinhi sa akong lubong.”

Mao kini ang hagit sa atong Ginong Hesukristo diha sa Ebanghelyo. Angay nga mopasaylo kita sa walay kondisyon ug walay sukod kay kita pasayloon usab sa Ginoo. Kung dili kita makapasaylo sama nga kita nanginahanglan sa pasaylo daw wala kita nahinumdom nga kita magkinabuhi dili sa atong kaugalingon. Iya kita sa Ginoo, mao nga sama unta kita kaniya malumo ug dugay nga masuko. Kay ang tawo nga madinumtanon dili angayan ug dili takos nga makadawat sa pasaylo. Mag-antus diya sa kasakit sa paghikalimot sa kaayo sa Ginoo kaniya.

Hinumdomi nga bisan kita nasakitan, dili unta nato undangon ang pagmahal sa isigkatawo bisan sa nakapasakit kanato. Dili nato hukman ug pugngan ang kahigayonan nga makita ang kaayo sa atong isigkatawo taliwala sa iyang kahuyang. Kita usab nanginahanglan sa pasaylo, busa angay lang nga kita usab makapasaylo. Opisyal ka man o yanong tawo, negosyante ka man o pumapalit, kita nanginahanglan sa pagsabot ug pasensiya niining panahon sa pandemya, aron magaanan ang atong mga pagbati. Diha lamang sa pasaylo anaa ang matuod nga kalinaw ug kalipay.