“What is there to celebrate in the Kadayawan Festival?” – Archbishop Valles

Gitambongan sa halangdon Mayor sa Davao, Sara Duterte-Carpio, ang Santos nga Misa pahinugod sa pag-abli sa ika-35 nga Kadayawan sa Davao didto sa San Pedro Cathedral, Agosto 10, 2020. Ang maong Santos nga Misa nga gipangulohan ni Arsobispo sa Davao ug Presidente sa Catholic Bishops’ Conference of the Philippines, Most Rev. Romulo G. Valles, D.D., gisalmotan sa pipila ka mga opisyal sa siyudad.

Sa iyang pamalandong atol sa iyang homiliya sa Misa, si Arsobispo Valles nagkanayon nga ang kahulogan sa pulong Kadayawan nagagikan sa pulong “maayo.” Matod pa niya nga bisan pa wala kitay mga pagpakita sa “kaayo” nga bunga sa atong abot sama sa mga bulak ug prutas, ug walay mga dagkong tapok sama sa mga “parade” ug sayaw karong tuiga, napalibotan gihapon kita sa mga daghang “kaayo”.

Siya miingon, “We are still able to celebrate as Davaoeños, that life is here in Davao.” Tataw alang kaniya nga ang kaayo sa matag usa ania kanato, “the goodness of our hearts, it does not need money, that in the midst of death and danger, we are not afraid to die like wheat planted on the ground.”

Ang yano nga pagpadayag niining kaayo nga ania kanato, matud niya, anaa sa pagsunod sa mga health protocols. Kini mahimo nato sama sa pagsuot sa face mask, pagpundo sa atong balay, pagpugong sa kaugalingon ug uban pa.

Dinasig sa Ebanghelyo, nabati sa Arsobispo nga niining maong paagiha, isip mga Davaoeño, atong masaulog ang Kadayawan, ang kaayo nga ania sa matag-usa nga molantaw alang sa kaayohan sa isigkaingon.