Kaloy-an ka sa Ginoo

Ika-23 nga Domingo sa Ordinaryong Panahon (September 6, 2020)
Ez. 33:7-9 / Sal. 95:1-2, 6-9 / Rom. 13:8-10 / Mt. 18:15-20

Silot ba sa Dios kining COVID 19 nga atong nasinati karon? Nakaamgo ba kita sa kaayo sa Ginoo taliwala niining krisis nga atong giatubang karon? Unsa bay grasya nga niabot kanato taliwala sa kalisod nga karon ania sa atong atubangan?

Sama sa gisulti sa unang pagbasa adunay pahimangno ang Ginoo sa tawong dautan. Kunga ang dautan dili mamati sa pagkuhit sa Ginoo, siya mamatay gayod. Mamahimo nga kining COVID 19 nga atong giatubang pagpaamgo sa Ginoo kanato nga kinahanglan atimanon nato ang mga gasa nga iyang gihatag kanato. Dili kini silot sa Dios. Maatiman unta nato ang palibot dili lang sa pagpananum karong panahona kondili sa tanang adlaw alimahan ang kalimpyo ug kahapsay sa palibot.

Ang pag-atiman sa Dios kanato mabati nato sa iyang dakong gugma kanato. Mahimo usab kitang mahigugma sa isigkatawo kung likayan ta ang pagpanapaw ug pagpamintaha sa uban. Kini ang pahinumdom kanato diha sa ikaduhang pagbasa. Higugmaon ta ang atong isigkatawo inay kita mopresyo og sobra panahon niining pandemya. Hunahunaon unta nato nga sama kanato ang uban usab naglisod ug nagpait. Busa, himuon ta ang unsay makaayo sa uban ug dili ang pagpahimulos sa sitwasyon.

Kita nakadawat sa kalooy sa Ginoo. Busa, buhaton usab unta nato ang maayo ngadto sa uban. Kini ang pagkulang sa tawong gikaloy-an diha sa Ebanghelyo. Dili nato pakaulawan ang uban, hinunoa, sa bugnaw nga panghuna-huna mobati unta kita sa kahimtang sa uban. Tas-on nato ang pasensiya ug pagsabot sama nga ang Ginoo misabot ug nagapasensiya kanato. Andam unta kita nga motabang aron malikay ang atong isigkatawo sa pagbalik sa sayop nga iyang nahimo. Dalhon nato ang matag usa paduol sa Dios ug dili kita maghimog eskandalo nga makapaluya sa pagtoo sa uban.

Ang gikaloy-an angay nga malooy. Matag hitabo sa kalibotan nagdalag mensahe sa patawag sa Ginoo aron kita dili mahikalimot kaniya. Grasya kaayo sa Dios ang atong madawat kung kita kanunay mamati sa iyang pagdapit nga magmaatinud-anon kaniya sa bisan unsang kahimtang nga atong masinati.