Ipahayag si Kristo

Ika-21 nga Domingo sa Ordinaryong Panahon
Is. 22:19-23 / Sal. 138:1-8 / Rom. 11:33-36 / Mt. 16:13-20

Niining panahon sa pandemya, daghan kanato nagtago tungod sa kahadlok. Daghan kanato nabalaka, nangutana, nalibog ug wala makasiguro hangtod kanus-a kita maluwas niining kalisod. Ang uban kanato nagduha-duha na gani sa panabang sa Ginoo. Apan sa tawong puno sa pagtoo, gihagit kita sa pagpahayag sa atong pag-ila ug pagtoo kang Kristo.

Aron mapahayag nato si Kristo sa tanan, kinahanglan nga diskumbrehon ta ang yawi ug susi sa pag-ila kaniya. Kinahanglan natong huptan ang yawi ug susi sa iyang pagpadayag kanato kung unsa man gayod ang iyang kabubut-n aron kini atong matuman. Ang hinungdan ngano nga buot pulihan ug palagputon sa Ginoo diha sa unang pagbasa ang mga pangulo nga naglingkod sa ilang posisyon ug trono mao nga tungod kay wala na sila naghupot sa susi sa kabubot-on sa Dios. Ang ilang gusto na lamang ang ilang gisunod. Manghinaut kita nga kining pandemya makahatag kanatog daghang higayon nga kita makahupot sa susi ug yawi sa pagdiskubre sa iyang pagbuot ug dili ang pagbuot sa tawo lamang.

Moa usab kini ang gasa nga gihatag ni Hesus kang Pedro, ang yawi sa gingharian. Si Pedro nakadawat sa susi sa pagpadayag nga maoy nakapaila kaniya kinsa gayod si Kristo. Kining maong susi mao usab ang naggiya kaniya sa pagpangulo sa tibuok Simabahan nga gibilin ni Kristo. Si Pedro padayon karon nga mangulo diha sa atong Santo Papa uban sa mga kaobispohan aron kita ilang madala sa kahayag sa pag-ila sa Dios. Hinaut unta nga padayon kitang mamati ug mosunod sa ilang mga pagtulon-an alang sa kahiusahan sa tanan ug kahapsay sa katilingban.

Tinuod nga sama sa giingon sa ikaduhang pagbasa, lisod tugkaron ug sabton ang kaalam ug kahibalo sa Ginoo. Mao kini ang atong nasinati panahon niining mga pangutana taliwala sa kalisod nga atong giatubang karon. Hinaut nga sa atong pagpangutana asa ug unsa na ang atong buhaton labina sa mga nawad-an og trabaho, sa mga negosyo nga naundang ug sa mga kapaninguhaan nga nahanaw, dili unta nato  wad-on ang atong kakugi nga mohimo sa ginagmay nga paningkamot bisan liso nga paagi apan minaayo kay buligan ra kita sa Ginoo. Kung hatagan lamang nato og himaya ang Ginoo sa atong kinabuhi mapahayag gayod nato sa tanan kung kinsa siya.