Ayaw pugngi ang Ginoo diha sa imong kinahiladman

Ika-22 nga Domingo sa Ordinaryong Panahon (August 30, 2020)
Jer. 20:7-9 / Sal. 63:2-9 / Rom. 12:1-2 / Mt. 16:21-27

Kinsa ba goy nagdahum kanato nga maingon niini kita niining tuig 2020? Kinsa bay nakaandam gayod nga moabot ang COVID 19 ug magdala kanatog hagit sa kalisod ug pagsulay? Dili gayo mapugngan ang hitabo nga wala nato damha.

Ingon niini usab ang presensiya sa Ginoo sa atong kinabuhi. Dili siya mapugngan ug dili angay nga pugngan. Si Jeremias, sa unang pagbasa, mipadayag nianang gahum sa Dios sulod kaniya. Ug siya wala makapugong, ni makalikay sa tawag sa Dios kaniya nga iwali ang iyang mga pulong.

Mao kining gahum nga dili mapugngan sulod kanato ang gisaligan ni San Pablo nga unta pagapuy-an sa mga taga Roma diha sa ikaduhang pagbasa. Kung masuta lamang nato ang kabubot-on sa Dios, kung unsay maayo ug makapahimuot kaniya, unsay hingpit, mapakita gayod nato kini sa tanan. Walay makapugong sa kaayo sa Dios kay kini mogula gayod sa tawo nga mituo kaniya.

Bisan pa unsaon pagpugong sa mga tinun-an nga dili unta mahitumpawak sa kamatayon si Hesus, kini mahitabo gayod kay ang kamatayon dili mohangtod, kondili mobanos ang pagkabanhaw. Kini ang kaayo ug gahum sa Dios nga maoy molig-on niadtong moagi sa pag-antus ug kasakit sa ilang pagsunod kaniya. Taliwala sa sakripisyo ug kasakit, ang matuod nga tinun-an, makabaton sa kadaugan ug himaya isip ganti sa umaabot.

Dili ba nasinati nato nga sama kang Jeremias, nabati usab nato nga dili mapugngan nga daw dalhon ang atong mga tiil sa pagsimba ug pagsaulog sa iyang pulong ug Eyukaristiya taliwala sa kwarentinas? Dili ba bisan dunay tentasyon sa pagpamintaha, sama sa pagpataas sa presyo sa palaliton, naningkamot kitang tawo nga makontrol ang mga magbuhat niini kay daghan ang angay nga tabangan tungod sa kalisod? Dili ba naningkamot kita mosunod sa gitawag nga mga protocols, ilabina ang mga nagsakripisyo natong mga fronliners, aron lamang kita dili makatakod, hinunoa makaluwas sa posibleng pagtapot sa sakit nga COVID ngadto sa uban? Kining tanan pagpadayag nga dili gayod mapugngan ang gahum ug kaayo sa Ginoo sa atong pagkinabuhi.