126th nga Kapistahan sa Parokya ni Santiago Apostol: Pagpalig-on sa Pagtuo Taliwala sa Pandemya

Simple man apan nahimong mabulukon gihapon ang pagsaulog sa ika-126 nga kapistahan sa parokya ni Santiago Apostol niadtong Hulyo 25, 2020 sa lungsod sa Cateel, probinsya sa Davao Oriental.

Madasigong gipa-ambit sa katawhan, ilabi na ang ilahang panahon, talento, ug bahandi alang sa mga pagpangandam sa kapistahan.

Ang unang misa sa kapistahan gipahigayon sa alas 6 sa buntag nga gipangulohan sa mga kaparian nga gikan mismo sa maong parokya. Kini sila mao si Rev. Fr. Edito S. Baño og si Rev. Fr. Donald Fernandez.

Sumala pa ni Rev. Fr. Donald Fernandez nga dako iyang kalipay nga nakamisa siya atol sa kapistahan sa parokya diin siya gikan.

Gi-ila usab ni Msgr. Carlos Bacquial, ang kura paroko, ang supporta sa katawhan diha sa ilang mga pagpaningkamot luyo sa pagpangandam alang sa kalampusan sa kapistahan.

Ang misunod nga misa gipanguluhan ni Obispo Abel C. Apigo. Sa iyang homiliya, iyang gikanayon nga ang kapistahan na-atol sa usa ka dili normal nga panahon gumikan sa pandemya.

Gidugang sa Obispo nga tinuod nga dako kaayo ang krisis nga nasinati karon. Apan taliwala sa mga pagsulay ug katalagman dili lamang niining probinsya apan sa kinatibuk-an, kining maong krisis dili mamahimong babag sa pagpakaylap ug pagpalig-on sa pagtoo.

“Maguol kita sa mga balita, sa nagkadaghan nga kaso sa Covid. Apan bisan pa man niining tanan, dili kita magpakawala sa paglaum, nga mabuntog nato ang kalaban, ang corona virus,” gipahayag sa Obispo.

Ang laing dako nga katalagman nga nasinati sa Santiago Apostol Parish mao ang paghapak sa bagyong Pablo niadtong tuig 2012 kung diin gatosan ka mga kinabuhi ang nakalas, ug daghang mga propiedad ang nadanyos, kalakip na mismo ang simbahan ug panginabuhian sa katawhan.

Ang pinaka-epektibo nga pangkontra sa mga pagsulay, matud pa sa Obispo, mao ang makanunayon nga pagtoo.

Natukod ang parokya niadtong tuig 1894, ug nakita ang paglambo niini sa pagpanglabay sa panahon.

Kini ang hinungdan nga mas milig-on pa ang pagtoo sa mga parokyano karon, mas nahimong maalamon sa pagpanglabay sa panahon, ug pabilin nga mibarog ug misimbolo sa usa ka nasulayan na nga pagtoo.