St. James the Apostle Parish 58 anyos na

Sa usa ka yano apan mahinungdanon nga seremonyas, ang parokya sa St. James the Apostle sa Bunawan nagsaulog sa iyang ika-58 nga kapistahan niadtong Hulyo 25, 2020 nga adunay tema nga, “Sr. Santiago nga bulahan, niining panahon sa pandemya imo kaming panlabanan”. Nahisentro sa maong pagsaulog ang Santos nga Misa nga gipanguluhan sa kura paroko nga si Rev. Fr. Rolando O. Mandreza, DCD kauban ang duha ka diyakono nga sila Rev. Marvin Del Campo ug Rev. Alfredo Bustamante Jr.

Ang homiliya ni Fr. Mandreza nagpunting sa tulo ka mga punto: una, ang matag pagsaulog sa pista sa usa ka patron usa usab ka pagsaulog sa kinabuhi ug misyon sa tibuok simbahan nga gihimong buhi sa panaw sa usa ka santos. Gipasidunggan si Sr. Santiago Apostol tungod sa iyang pagtubag sa tawag ni Kristo sa pagsunod kaniya aron pagbuhat sa mga buluhaton sa Diyos. Ikaduha, gihagit niya ang mga katawhan sa pag-ingon, “Kinsa man kanato ang andam nga kalimtan ang personal nga ambisyon o mga interes alang sa pagpalambo sa mga buhat sa Dios?” Gidugang niya nga kinahanglang ilubong ang pagkamapasigarbohon aron mamahimo kitang matinud-anon nga mga sumusunod ni Kristo ug andam nga biyaan ang mga kaugalingong interes. Ikatulo, iyang gisaysay nga si Sr. Santiago Apostol nahikalimot sa iyang kaugalingon ug personal nga mga ambisyon aron musanong sa tawag sa Diyos. Sa katapusan iyang gidasig ang katawhan nga bisan taliwala sa kalisdanan niining pandemya, magpabilin unta kita nga matinud-anon sa pag-alagad inubanan sa pagsalig nga ang Diyos kanunayng nakig-uban sa atong mga paningkamot.

Pinasahi kining maong pagsaulog sa kapistahan tungod kay nahimutang pa ang dakbayan sa Modified General Community Quarantine diin wala pa gitugutan ang pagpahigayon ug mga kalingawan. Gani sa wala pa magsugod ang Santos nga Misa, higpit gayud nga gipahamtang ang mga health protocols. Pagkahuman sa Misa, malinawon nga nanguli ang mga parokyano ug nagsaulog sa pista sa ilang tagsa-tagsa ka mga panimalay.

Sa katapusan, nagpasalamat si Fr. Mandreza sa malampuson nga pagsaulog sa kapistahan ni Sr. Santiago Apostol tungod sa pagpaningkamot sa matag usa nga mapahapsay ang mga yano apan mabulukon nga mga kalihukan (An-Jean V. Naraga | SJAP SocCOm)