Puy-i ang Pagkamapailubon

Ika-Napulo’g Unom nga Dominggo sa Ordinaryong Panahon (Hulyo 19, 2020)
Kaalam ni Solomon 12:13, 16-19 / Rom. 8:26-27 / Mat. 13:24-43

Naay uban kanato nga daw ang kangil-ad ang kanunayng makit-an inay ang maayo sa usa ka tawo, butang ug sitwasyon. Nahinumdum ko sa akong kauban kaniadto sa seminaryo panahon sa among senimana nga apostolado sa bilangguan. Matag Dominggo sa buntag una mi manggikan, kanunay ni siyang muingon nga, “Exposure na pud ta karon…hadloka ani oy basig magriot ug pinakalit didto ba, maangin pa ta.” Kay kini man kanunay ang iyang panglantaw, kanunay sab siyang mahadlukon. Subo pamalandungon nga ang kansang panglantaw maoy naggiya kaniya sa pagtan-aw sa mga binilanggo, mga butang ug mga sitwasyon sa sulod sa bilangguan. Apan sa pipila ka mga Dominggo nga milabay, iyang namatikdan nga wa gayuy nahitabong kagubot panahon sa among apostolado. Mao nga sa hinay hinay nabag-o ang iyang panglantaw sa kinabuhi. Nakakat-on siya sa pagpailob ug nakit-an niya ang mga maayong gawi ug kinaiya sa mga binilanggo.

Nagmapailubon usab ang Diyos kanato ug ato kanang makita diha sa unang basahon diin diha sa pagkamakaangayon sa Diyos iya kitang gidumala sa dakong pagpailob. Nasayod ang Diyos nga huyang kita ug wala kita niya biyai. Miunong siya kanato pinaagi sa pagkatawo sa iyang Bugtong Anak ug diha sa iyang kamatayon ug pagkabanhaw, nahaw-as kita gikan sa sala. Wa magdumili ang Diyos sa pagbangon kanato bisan pa sa daghang higayon nga daw nabulit kita sa lapok sa sala. Kining tanan tungod kay siya mapailubon. Iya kitang gihatagan ug igong higayon nga mabag-o. Si San Pablo, sa ikaduhang basahon, mipaambit usab sa pagkamapailubon sa Diyos. Tungod kay nasayod ang Diyos sa atong kahuyang, iyang gipadala ang iyang Espiritu aron mugiya kanato diha sa atong mga lakang ug mga laraw.

Ang Ebanghelyo nagpadayag usab sa susamang kinaiya sa Diyos. Sa unang sambingay, gipadayag ni Hesus nga wa ipaibot sa tag-iya ang mga sagbot nga nagdunga’g panubo sa mga trigo. Apan ang iyang mga suluguon abtik kaayong misugyot ngadto kaniya nga pangibton kini kay makadaot sa pagtubo sa trigo. Mao sab kita. Daghang higayon nga buot pud natong pangibton ang mga gituohang ‘sagbot’ sa katilingban. Ang labing subo kay diha sa atong kaikag sa pagpangibot, atong nahikalimtan nga aduna sab diay daghang sagbot ang atong kinabuhi. Ang unod sa laing duha ka sambingay naghatag kanato’g dugang pagpasabot mahitungod sa pagpailob. Ang liso sa mustasa pino kaayo ug daw way kapuslanan apan kung itisok kini sa yuta magmabungahon kini. Mao sab ang patubo. Kinahanglan kining isagol sa trigo aron mamahimong pan. Kining mga sambingaya nagtudlo kanato nga dakong realidad ang pagtubo ug ang kabag-ohan bisan diha sa mga giilang ‘sagbot’ sa katilingban. Kung mapailubon kita sa paghatag kanila’g higayon sa pagbag-o, kining maong mga ‘sagbot’ mamahimong sama sa mga trigo diha sa parasan sa Ginoo.

Diha sa atong pagpadayon sa pagsunod sa Ginoo, giawhag kita nga mamahimong mapailubon giniyahan sa panglantaw nga makaangayon ilabi na ngadto sa mga giilang ubos sa katilingban. Mahinungdanon kaayo kining maong kinaiya samtang padayon kita sa pakigbisog sa pandemya sa Covid-19. Ato untang makita nga kining atong nahiaguman usa ka maanindot nga higayon sa pagkat-on, sa pagtubo ug sa pagpalambo sa atong kinabuhi uban ni Kristo.

Ginoong Hesus, tudloi kami sa pag-ila sa among isigkaingon susama sa imong pag-ila sa among kinatibuk-ang pagkatawo. Amen.