Ika-71 nga Kapistahan sa Parokya sa Sta. Ana Shrine Gisaulog

Ang ika-71 nga kapistahan sa parokya sa Sta. Ana Shrine nahimong mabulukon ug halandumon tungod sa tulo ka mga rason. Una, natunong kining maong kapistahan sa adlawng Dominggo – ang adlaw sa Ginoo. Ikaduha, gipanguluhan kini ni Arsobispo Romulo Valles – ang pinakaunang misa sa arsobispo kauban ang katawhan human siya masakit sulod sa pipila ka bulan. Ikatulo, gisaulog usab ni Fr. Junar dela Victoria ang kasumaran sa iyang adlawng natawhan sa susamang adlaw sa kapistahan.

Siguro muingon ang pipila kanato nga naatol lang gyud kining tanan o ‘coincidence’ apan diha sa probidensiya sa Diyos kining tanan dili ‘naatol’ lang o ‘coincidence’, kining tanan kabahin sa iyang mga laraw.

Tungod kay padayon pa sa pagpaalim ang arsobispo, gipahigayon ang Santos nga Misa sa bag-ong kapilya didto sa iyang opisyal nga puloy-anan. Live kini nga gisibya sa DXGN 89.9 Spirit FM ug gitambungan sa mga kaparian sa parokya sa Sta. Anna Shrine ug pipila ka mga pari. Gikanayon sa arsobispo diha sa iyang homiliya nga ang pagtoo nga atong nahuptan usa ka bahandi – sama sa usa ka mutya nga dunay talagsaong bili.

Sa unsang paagi atong mapalig-on, mapalambo ug mapalawom kining atong pagkupot sa mutya nga dunay talagsaong bili? Ang arsobispo mitanyag sa mga musunod: Una, ang kapistahan nagpadayag og usa ka mahinungdanong bahin sa atong pagtoo – ang kaambitan sa mga Santos. Ang pag-ila ug paghandom sa mga Santos maghatag kanato’g dugang kasayoran sa bililhon nga gasa nga atong gikuptan. Gidugang niya nga ang kapistahan ni Sta. Anna nagtudlo kanato nga diha sa mga Santos atong makita ang di masukod nga plano sa Diyos. Si Sta. Anna nagsabak kang Birhen Maria – gipanamkon nga walay sala. Kabahin sa laraw sa Diyos nga iya kitang hikapon ug dasigon nga makigtambayayong kaniya aron atong makita ang iyang presensiya ug mutubag kita diha sa pagtoo. Gikanayon sa arsobispo nga mao kini ang pagkupot sa bahandi ug mutya nga di matukib.

Ikaduha, gisaysay sa Obispo ang sugilanon ni Solomon nga nangayo sa Ginoo og kaalam labaw sa tanan. Iyang gidugang nga kitang tanan mangayo sa Diyos og gasa sa kaalam aron diha sa atong pagpili o paghimo’g mga desisyon ang kaalam sa Diyos ang atong mamahimong giya sama ni Sta. Ana ug San Joaquin. Gikanayon sa arsobispo nga pangayoon ta kanunay sa Ginoo ang gasa sa kaalam aron sa hinay hinay makakat-on kita sa pagbaligya sa atong mga ‘katigayunan’ aron atong maangkon ang bahandi nga dunay talagsaong bili. Iyang gidugang nga ang Diyos kanunay nga mutabang kanato kung matinud-anon kita sa atong tinguha nga makuptan ang bahandi sa langit.

Sa katapusan, mapasalamaton ang arsobispo sa tanan nga padayon nga nag-ampo alang sa iyang hingpit nga kaayuhan. (Jerick Asdang)