Parokya sa St. John the Baptist nagsaulog sa ilang ika-55 ka Tuig nga Kapistahan

Malipayong gisaulog sa parokya sa St. John the Baptist sa Lasang ang ilang ika-singkwenta y singko nga kapistahan niadtong Hunyo 24, 2020. Pinasahi kining maong pagsaulog tungod kay anaa pa man sa General Community Quarantine ang dakbayan tungod sa COVID-19 ug wala gitugutan ang panagtapok diha sulod sa simbahan nga mulapas sa napulo ka tawo.

Nahisentro sa maong pagsaulog ang Santos nga Misa ug nagsugod kini sa alas otso sa buntag ug gipanguluhan sa ilang kura paroko nga si Fr. Jovilo Bongay. Bisan pipila lang ang gitugutan sa sulod sa simbahan panahon sa misa, nakaambit gihapon sa kasadya ang kadaghanan tungod kay nakita kini sa facebook page sa atong mantalaan pinaagi sa live streaming ug nadungog usab kini sa pagsibya sa DXGN 89.9 Spirit FM.

Ang homiliya ni Fr. Bongay nagpunting sa pangutana sa mga katawhan diha sa Ebanghelyo mahitungod sa pagkatawo ni Juan, “Unsa kahay kaugmaon niining bataa…? Kining maong pangutana iyang gidala ngadto sa atong konteksto karon ilabi na sa mga kabataan nga ginatawag ug mga millennials. Gipasabot ni Fr. Bongay nga ang mga kabataan karong panahuna nagpuyo ug lahi nga palibot ug konteksto sa pagkinabuhi. Iyang gisaysay nga ang mga hamtong ang mga tinugyanan sa pagmatuto ug paggiya sa mga kabataan. Matud pa niya nga dili makatabang sa pagtubo sa kabataan kung ang mga gitahasan sa pag-amuma kanila maoy mamahimong babag diha sa ilang paghimo ug mga desisyon sa kinabuhi. Iyang gidugang nga ang Ginoo adunay kabubut-on alang niining mga kabataan ug ang mga hamtong ang mamahimong taytayan aron matuman kining maong kabubut-on.

Ang tibuok adlaw nahimong makahuluhanon sa matag-usa ug wala nahimong babag ang pandemya sa COVID-19 aron ilang mapadayag sa Ginoo ang ilang pagpasalamat ug kasadya kauban ang ilang tagsa-tagsa ka pamilya. (Jerick Asdang)