Mga Tahas Sa IPMR Gihisgotan

Taliwala sa COVID-19 nagpadayon ang pag-edukar sa mga lumad pinaagi sa ahensiya sas Indigenous Peoples Apostolate inubanan sa National Commission on Indigenous Peoples ug sa Josefa Segovia Foundation.

Mao kini gibutyag sa National Commission on Indigenous Peoples kon NCIP dinhi sa dakbayan nga si Atty. Ronnie Bulutano atol sa binulan nga programa sa IPA sa radyo nga KKK nga gisibya sa DXGN 89.9 Spirit FM.

Tumong sa maong panaghisgot mao ang padayon nga pag-edukar sa mga Indigenous Peoples Representatives kon IPMR pinaagi sa IP academy. Gilauman nga agig mga seminars ug trainings, ang mga IPMRs mas mulambo diha sa ilang pagsabot ug pagpahamtang sa mga balaudnon nga dunay kalambigitan sa ilang tagsa-tagsa ka mga tribu.

Sa pagkakaron, adunay siento dise syete ka mga nakabenepisyo niining maong programa.

Gihisgotan pinaagi sa online streaming ang lokal nga mga balaudnon ug ang hisgotanang legal sa nasud mahitungod sa mga kaigsuonang lumad.

Gikanayon ni Atty. Bulutano nga pinaagi sa Republic Act 8371 o ang Indigenous Peoples’ Rights Act kon IPRA, naprotektahan ang katungod sa mga lumad nga magdumala sa yutang kabilin sa ilang mga katiguwangan kon ancestral domain.

Gidugang niya nga kining maong balaod naghatag usab ug oportunidad ngadto sa mga lumad nga sila mahilambigit diha sa natad sa pulitika.

Gilatid niya nga ang mga lumad dakong kabahin sa nasudnong kalambuan mao nga angayan lamang nga aduna silay papel sa paghimog mga desisyon. Gisaysay ni Atty. Bulutano nga subay sa maong balaudnon ang pagkahimugso sa Indigenous Peoples Mandatory Representative kon IPMR.

Pinaagig consensus kon hiniusang desisyon sa tribu ang pagpili sa representante ug nahiuyon kini sa ilang mga kustombre.

Pipila sa mga katungdanan niining usa ka IPMR mao ang mga musonod: siya ang mamahimong tingog sa tribu diha sa natad sa lehislatibo o pagpanday ug mga balaod, siya ang tigpasiugda ug mga programa nga maghatag ug suportang panalapi alang sa kalambuan sa tribu.

Siya usab ang tighimo ug mga dokumento nga magpatunhay sa ilang kultura ug pamaagi ug magpasabot ngadto sa iyang tribu mahitungod sa balaod.

Sa katapusan, nagpasalamat si Fr. Acedo sa mga kalampusan sa apostolado ug iyang panghinaut nga kanunayng hatagag bili ug respeto ang mga lumad kay sila katawhan usab sa Diyos. Nagpasalamat usab ang iyang mga kaubanan kay bisan taliwala niining pandemya nahimong malampuson ang ilang panag-ambitay. (Jerick Asdang)