Maloloy-on ang buhing Dios

Divine Mercy Sunday, Second Sunday of Easter (April 19, 2020)
Acts 2:42-47 / Psalms 118:2-4, 13-15, 22-24 / 1 Peter 1:3-9 / John 20:19-31

Unsaon man nato pagsinati nga naluoy ang Dios kanato atubangan sa krisis sa COVID-2019? Unsa bay mga timailhan nga ang Dios naluoy kung daghang nangasakit o nangamatay? Kanus-a man kita makakita sa kalooy sa Dios kung naa kita sa kwarentinas ug anaa na lamang kanaunay sa atong panimalay?

Ang Dios nagpakita sa iyang kalooy sa matag higayon nga kita maghiusa ug magtinabangay sama sa mga Apostoles sa unang pagbasa. Ang inigsuong panaghiusa masinati diha sa pag-ampo natong tanan bisan anaa lamang kita sa atong panimalay. Nasinati usab nato karon nga daghan diay gihapon ang mopaambit sa ilang mga pagkaon pinaagi sa pagdonar aron kadtong mga wala nay kapaninguhaan makakaon.

Ang Dios nga mao ang gugma nalooy sa mga front liners – mga nars, doktor, military, opisyales sa panggamhanan nga sa walay pagkwenta naghago pag-alagad aron masumpo ang COVID-19. Kining maong gugma maghatod sa pagkamapasalamaton niadtong mitahan sa ilang kinabuhi uban sa kapiligro nga matakdan aron lang ang uban maalagaran. Kining maong pasalamat sa gugma maoy atong gitubag diha sa Salmo. Ang tawo nga mapasalamaton nakasinati sa kalooy sa Ginoo.

Ang Dios maloloy-on kay taliwala sa pagsulay ug kalisod siya mismo miagi usab sa pagpasakit. Pinaagi sa pagsakripisyo niya ug pagpakamatay sa krus kita nakaambit usab nianang maong pagpasakit. Uban sa paglaum ug pagtoo sa iyang kalooy, sama sa giingon sa ikaduhang pagbasa, kita maluwas.

Ug sa kataposan ang Dios maloloy-on kay bisan sa atong pagkulang sa pagtoo, mangita siyag higayon nga kita makahikap kaniya, sa iyang mga samad aron kita motuo. Kini nasinati ni Tomas diha sa Ebanghelyo. Kung gidid-an man kita sa paghikap sa usag usa tungod sa kapiligro nga mataptan sa COVID-19, ang Dios nag-awhag kanato sa paghikap sa iyang samad aron kita makasinati sa iyang kalooy. Ang paghikap sa iyang samad nagpasabot nga modawat kita nga kita madutlan diay sa sakit ug dili nato kontrolado ang tanan. Apan ang Dios maoy moayo kanato kay malolo-on gayod siya.