PSL nagsaulog sa iyang 75th birthday

“Habang may Buhay” mao kini ang pulong nga gihuptan ni Tatay Cal (Anacleto Cal), usa ka PSL Coordinator sa Our Lady of the Miraculous Medal Parish, Indangan. Niadtong Pebrero 9, 2020, iyang gisaulog ang ika-75 ka tuig sa adlaw niyang natawhan. Matud pa niya, iyang itahan ang iyang kaugalingon diha sa pagpangalagad sa Ginoo, pinaagi sa pagserbisyo sa GKK ug sa Parokya hangtod nga may kinabuhi pa siya.

Si Tatay Cal nagsugod pagserbisyo isip usa ka alagad sa Simbahan niadtong tuig 1970 didto sa parokya sa St. Francis Xavier, Tibungco. Siya usa ka myembro sa KSP o Kaabag sa Pag-ampo nga sa pagkakaron gitawag na ug PSL kon Pangulo sa Liturhiya. Ang iyang GKK niadtong panahona mao ang GKK San Isidro Labrador sa Barangay Acacia. Bisan pa sa kalayo sa iyang pinuy-anan wala kini makababag kaniya sa pagpangalagad. Matud pa niya nga bisan walay masakyan moadto gayud siya sa parokya aron pag-apil sa mga meeting. “Usahay magsumpaki pa mi sa akong asawa kay unahon man gyud nako ang pag-adto sa simbahan kay sa buluhaton sa panimalay,” matud pa niya.

Bisan sa mga pagsulay ug kalisdanan si tatay Cal nagmalahutayon siya sa iyang pagserbisyo kay matud pa niya anaa ang iyang kalipay sa pag-alagad sa Dios, ug ang pagsuporta sa mga kaubanan sa simbahan ilabina ang kura paroko maoy nakahatag ug kadasig sa iyang pagserbisyo.

Niadtong tuig 2009, sa pagsugod sa parokya sa Indangan, nibalhin siya sa maong parokya kay nahisakop na man ang Barangay Acacia sa Miraculous Medal parish ug nagpadayon siya pag-alagad isip usa ka PSL Coordinator ug myembro usab siya sa EOMHC (Lay Minister).

Hangtod karon tuiga 2020, anaa gihapon siya sa parokya ug nagpadayon ang iyang mga buluhaton isip usa ka PSL ug Lay Minister. Dako ang iyang pasalamat sa Ginoo nga gihatagan pa siya og higayon nga maka serbisyo tungod sa kalagsik ug kalig-on sa panglawas nga gihatag sa Dios kaniya. (Anabelle Ejercito Encluna)