OLMMP SoCCom, gipadala ug gipanalanginan

Atol sa pagsaulog sa Kwaresma, ginapahigayon ang mga Recollections sa mga parokya. Usa sa mga ministriya diha sa parokya ang kometiba sa Social Communications nga gilangkoban sa mga secretary gikan sa lain-laing Gagmay’ng Kristohanong Katilingban ang mipahigayon sa renewal recollection niadtong Marso 1, 2020 didto sa Sto. Niño chapel, Franciscan TOR Compound, San Miguel, Indangan.

Adunay 34 ka mga partisipante ang mitambong sa maong recollection nga adunay tema “Finding Jesus in Love and Mercy in the Midst of Suffering” nga gipaambit ni Brother Ronnell Lontayao Macaldo, usa ka Franciscan TOR.

Sulod sa maong input adunay group sharing nga gipahimo sa tagsa-tagsa ka mga partisipante ug gipaambit kini sa kinatibuk-an. Panahon sa sharing, nagkalain-lain ang mga kasinatian nga gipaambit sa matag usa, adunay kalipay apan mas daghan ang kasakit nga ilang nasinati, pero wala kini nakapaluya kanila tungod kay daku ang ilang pagsalig sa Ginoo.

Malipayon kaayo ang grupo sa maong activity tungod kay ila kining napaambit ngadto sa uban ug nahimo usab nga inspirasyon sa mga kaubanan diha sa grupo. Human sa maong kalihukan gitapos kini sa usa ka Santos nga Misa nga gipanguluhan ni Rev. Fr. Rowel Quinamague, TOR.

Niadtong Marso 8, 2020, atol sa ikaupat nga misa sa parokya, gipadala ug gipanalanginan sa kura paroko nga si Rev. Fr. Jesus Samaniego ang maong ministriya ug malaumon siya nga mohimo ang matag miembro sa maong ministriya sa ilang mga kaakuhan. (Anabelle Ejercito Encluna | OLMMP SoCCom)