Mobile Blood Donation (Bloodletting) gipahigayon sa St. Mary’s Parish

Mobile Blood Donation (MBD) Program, usa sa mapadayunong programa sa buhat sa Kalooy sa Parokya ug usa kini sa mga regular nga programa nga nakalatid sa tinuig nga Plano sa Parish Social Action Ministry (PSAM), aron makatabang ug makaluwas sa kinabuhi sa mga parokyano ug ubang katawhan nga nanginahanglan og dugo.

Gipahigayon ang unang Mobile Blood Donation (MBD) Program kon Bloodletting sa tuig 2020 sa Parokya sa St. Mary of the Perpetual Rosary, Buhangin niadtong Pebrero 23, 2020 diha sa St. Mary Parish Sports for Peace and Livelihood Training Center diin adunay tema nga nagkanayon: “Dugo hinungdan sa kahiusahan sa nagkalain-laing pagtoo sa katawhan”.

Adunay 181 ang nagrehistro nga volunteer nga adunay intention nga modonar apan 161 lamang ang malampuson nga nakuhaan og dugo tungod sa nagkalain-laing hinungdan. Hinayhinay nang nasabtan sa mga parokyano ilabina sa mga donor ang ka-importante niini. Ang timailhan mao nga aduna nay mga parokyano nga nakuhaan na og dugo sa siyam ka beses mao nga gitawag na sila nga blood galloners.

Malampuson nga napahigayon ang maong MBD tungod sa pakighiusa sa Blood Bank Center sa Department of Health ug sa St. Mary of the Perpetual Rosary Parish pinaagi sa Parish Social Action Ministry (PSAM) nga gipangulohan sa MBD coordinator, Elizabeth Sabucido. Mapasalamaton ang PSAM coordinator, Joel Corage sa PSAM core group, Caritas, PSA, K of C (Kiwanis Club of Kalumonan Dabaw), mga batan-on nga miembro sa St. Mary Action Response Team (SMART), GSL ug miembro sa katilingban nga nag-volunteer nga nihalad sa ilang kaugalingon diin sila kabahin sa maong nagmalampuson nga MBD ug ilabina sa makanunayong suporta sa Kura Paroko, Fr. Dionisio Tabiliran. (Hermie Mapute | SMPRP SoCCom)