Gi-uhaw

Ika-tulong Domingo sa kuwaresma
Ex 17:3-7 / Ps 95:1-2, 6-7, 8-9 / Rom 5:1-2, 5-8 / Jn 4:5-42

Ang Katesismo sa Katolikong Kristyano numero 27 nag-ingon: “Natural alang sa matag tawo ang pagpangandoy sa Dios. Tungod kay ang atong kauhaw wala maggikan kanato kondili gikan sa usa ka Tinubdan nga mismo giuhaw kanato.” Matud pa ni San Gregorio Nazianzen, “Ang Dios giuhaw sa matag usa kinsa giuhaw usab kaniya.”

Mao kana ang kamatuoran. Ang Dios giuhaw kanato. Siya sa kanunay ang nagsugod sa tanan. Miingon si Jesus; “Dili kamo ang nagpili kanako. Ako ang nagpili ug nagtudlo kaninyo aron kamo maglakaw ug mamunga ug bunga nga molungtad, busa ihatag kaninyo sa Amahan bisan unsay inyong pangayoon kaniya pinaagi sa akong ngalan.” (Jn 15:16)

Samtang si Jesus nagdupa sa krus miingon siya, “Giuhaw ako”. Ang usa ka sundalo, mihatag kaniya ug bino aron imnon. Apan matud pa ni Matthew: “Sa diha nga gitilawan niya kini, wala siya moinom niini.” Giuhaw siya apan wala siya moinom niini. Lain seguro nga kauhaw ang iyang gibati, labaw ka halawom nga matang nga kauhaw. Karon nga Domingo mao usab ang iyang gihangyo sa babayeng Samaritana, “Hatagi ako ug mainom”, ug “giuhaw ako”. Sa pagkatinuod, ang iyang kauhaw mao ang gugma sa iyang katawhan. Buot niya nga ihalad ang tubig nga maghatag sa kinabuhi. “Ang tubig nga akong ihatag mahimo diha kaniya nga tuburan nga mohatag ug buhing tubig ug kinabuhing walay katapusan.” (v.14)

Kita mao ang gikapoy, giuhaw nga mga lumalangyaw ning dakung walog sa kagutom ug kauhaw ning kalibutan. Si Jesus lamang ang atong dalan padulong sa gingharian nga mao ang kalipay. Siya na mismo ang naghalad sa walay bayad nga tanang mga gasa sa Espiritu Santo nga magpahimo kanatong makasulod ning gingharian sa Dios. Miingon siya: “Ako ang Dalan, kamatuoran ug ang kinabuhi. Walay makaadto sa Amahan kon dili moagi kanako.” (Jn 14:6)

Ang Kuwaresma mao ang usa ka panahon nga makahimo kita ug makahuluganong pag-ampo ug kaugalingong pagsusi sa kaugalingon. Sama sa babayeng Samaritana kinsa naka-diskobre sa buhing tubig diha kang Jesus pinaagi sa iyang pagpakig-istorya kaniya, kita usab kinahanglan mogahin ug igong panahon aron makiglambgit ug kanunay makig-istoya-o communicate kang Jesus diha sa kahilom ug pag-ampo. Pinaagi niini makaplagan nato diha sa atong kasingkasing ang atong daghang mga kauhaw ngadto sa Dios kinsa siya lamang ang makatagbaw niini. Sama sa Salmista miingon: “Ingon nga nangandoy ang lagsaw sa mabugnaw nga kasapaan, nangandoy usab ako kanimo O Dios! Giuhaw ako kanimo, O buhing Dios!” (Ps. 42:1-2)