Bag-ong pari nagsaulog og Misa Pasalamat sa Parokya

Niadtong Domingo, Marso 8, 2020 mipahigayon og Misa Pasalamat si Rev. Fr. Joe Mark Fuentes, Diocesan Clergy of Cotabato, sa parokya sa Miraculous Medal Indangan, Buhangin, Davao City. Siya naordinahan sa pagkapari niadtong Pebrero 12, 2020 didto sa San Nicolas de Tolentino Parish, Bagumbayan, Isulan, Sultan Kudarat.

Si Fr. Joe Mark mao ang usa sa mga seminarian sa Regional Major Seminary of Mindanao nga na-assign sa parokya sa Indangan niadtong tuig 2018 panahon sa iyang parish exposure. Matod pa niya nga iya gayud gituman ang iyang saad nga mobalik sa maong parokya aron magpasalamat tungod kay ang Miraculous Medal Parish nahimong dakong kabahin sa iyang bokasyon isip usa ka pari.

Mapasalamaton kaayo siya kay Fr. Jess Samaniego, ang kura paroko sa maong parokya tungod sa paggiya niini kaniya. Human sa iyang Misa adunay salu-salo nga giandam ang kura paroko inubanan sa Parish Staff ug sa mga miembro sa Parish Pastoral Council sa maong parokya. (Anabelle Encluna | OLMMP Parish SoCCom)