Ang Pagsabwag sa Abo gipahigayon sa 42 ka GKK sa Parokya ni St. Joseph Parish

Ang mga Gagmay’ng Kristohanong Katilingban (GKK) sa Parokya ni St. Joseph Parish, Sasa, Davao City, sa unang higayon, naghimo og pagsabwag sa abo sa tanang mitambong sa Kasaulogan sa Pulong pinaagi sa mga PSL nga gibansay ug gipadala sa Kura Paroko, niadtong Miyerkules sa badlis, Pebrero 26, sa gabii ngadto sa nagkalain-laing GKK sakop sa Parokya. Sukad masukad, karong tuiga pa kini nahitabo nga gihimo sa GKK.

Usa kini ka maayong kabag-ohan sa simbahan nga gi-implementar sa mga GKK, aron usab mahatagan og higayon, ilabi na gayod sa atong mga kaigsuonan nga walay higayon sa pag-adto sa Parokya. Daghan ang nalipay sa maong kahigayonan nga gitugot sa Kura Paroko na si Rev. Fr. Leonardo Dublan, Jr.

Angay natong hinumduman ang Miyerkules sa Badlis mao ang pag-abli sa panahon sa kwaresma diin kita magsaulog ug mamalandong sa pag-antus ug kamatayon ni Kristo. Uban sa iyang pagkabanhaw, importante kining kwaresma kay mao kini ang tuburan sa atong kaluwasan – ang Paskwal nga misteryo sa atong Pagtoo.

Kitang tanan maningkamot gayud sa pagbansay niini, dili aron lamang sa pagtuman, kon dili aron kita molambo sa atong Kristohaong Kinabuhi, uban sa panabang sa atong mahal nga inahan, Birhen Maria, ug sa giya sa Espiritu Santo, ma-angkon unta nato ang makahuluganong kasaulogan sa kwaresma. (Rita Mariano | SJWP SoCCom)