Alay Kapwa 2020 Launching at St. Mary of the Perpetual Rosary Parish

Ang Alay Kapwa usa ka programa sa CBCP – National Secretariat Social Action, diin gibuhatan kini og concrete action sa Archdiocese of Davao pinaagi sa Archdiocesan Social Action Center (ASAC). Gi-promote ang campaign sa tulo (3) ka mga buluhaton sa mga magtotoo sama sa pag-ampo, formation ug almsgiving panahon sa kwaresma.

Tungod niini ang St. Mary of the Perpetual Rosary Parish sa Buhangin, Davao City pinaagi sa Parish Social Action Ministry (PSAM) milunsad sa programa nga Alay Kapwa 2020 niadtong Marso 1, 2020 sulod sa Santos nga Misa sa alas 9:30 sa buntag nga gipangulohan sa parochial vicar, Fr. Rey Sabuero. Diha sa Santos nga Misa gibendisyonan ni Fr. Rey ang mga galamiton alang sa alay kapwa diin gidala kini sa mga Zone Coordinators sa Pangulo sa Katilingban (PSK), Pangulo sa Liturhiya (PSL) ug Pangulo sa Alagad (PSA) nga maoy nag-represent sa kada ministriya diha sa katilingban.

Pagkahuman sa paglunsad kon launching sa Alay Kapwa sa parokya, ang matag Gagmay’ng Kristohanong Katilingban (GKK) nga nahisakop sa parokya sa St. Mary of the Perpetual Rosary pinaagi sa Tigpasayon Pundok Banay (TPB) inubanan sa mga GKK Servant Leaders (GSL) gitahasan nga magsugod na sa ilang gimbuhaton diha sa pag-ampo sa matag panimalay nga nahisakop sa tagsa-tagsa nila nga katilingban.

Diha sa pag-ampo ug sa pagpamalandong makasalmot sila sa buhat sa kalooy kon almsgiving diin sa ilang pagsakripisyo panahon sa kwaresma mamahimo nga ihalad nila kini sa alay kapwa aron makatabang sa mga nanginahanglan ilabina sa disaster’s program sa parokya. (Hermie Mapute | SMPRP SoCCom)