VDLR Parish nagsaulog sa kapistahan

Aligre kaayo ug nahisahi sa mga nilabay nga tuig ang pagsaulog sa ikasiyam nga kapistahan sa parokya sa Virgen delos Remedios, Crossing Bayabas, Toril nga adunay Tema Santa Maria: Among Kalig-on ug Kadasig sa pagsunod ni Kristo diha sa tuig sa dialogo. Ang tanang kalihokan adunay bendisyon sa kura paroko nga si Fr. Anthony Silvosa uban sa iyang parochial vicar nga si Fr. Leif Simbajon.

Agi’g opening salvo sa unang adlaw sa Novena niadtong Enero 24, gikauyonan sa tanang GSL sa 76 ka GKK nga dungan nga magbagting sa tagsatagsa ka kapilya sa alas 3 sa hapon ug ang pagsabasaba sa kadalanan nga ang mga GSL nagsakay sa ilang mga sakyanan gikan sa Distrito 1 hantod sa 6 aron pagpahinumdom sa katawhan nga gasugod na ang unang adlaw sa novena. Pagka Enero 25 gihimo ang last canvassing sa “GKK Family 2020” nga gipanguluhan ni Mrs. Naty Genargue, Chairman sa Finance Committee sa VDLR.

Ang palaparan nga namahimong Hari ug Rayna mao silang Mr. and Mrs. Vincent Verano uban sa ilang bugtong anak nga gikan sa GKK sa Holy Family, Upper Piedad. Pagkahapon gihimo ang raffle draw sa “Fiesta Raffle 2020” nga ang tumong niini mao ang paghimo sa proyekto sa Parokya ug GKK, ug ang bulahan nga nidaug anang premyo nga P7,000.00 nagagikan sa GKK sa San Antonio de Padua, Lubogan.

Sa adlaw sa bisperas Pebrero 1, gisugdan ang adlaw sa “Zumba Fiesta” sa Parokya nga gipangaluhan sa Ministriya sa LCM nga gipahigayon sa covered court sa parokya nga tumong niini mao ang pagka dugang pundo alang sa proyekto sa parokya. Pagkahapon gihimo ang koronasyon sa “GKK Family 2020”. Daghan ang mihalaug mga nagkalainlaing mga pasundayag alang sa mga candida ug royal court lakip niini ang youth apostolate, San Miguel Integrated School, Piedad Elementary School, District 1-6, ug ang Loyola Elementary School. Ang ikaduhang bahin sa seremonya mao ang pagsindi sa kandila ni Fr. Silvosa usa gikanta ang “O Maria, Reyna sa Pilipinas.” Dayon gisunod na ang prosisyon nga gisalmutan sa 76 ka GKK uban ang ilang patron. Pagkahuman sa misa gisundan ang basketball VDLR PSL batok sa Davao Clergy nga ang kaparian ang nidaug sa dula.

Viva Maria! Viva Hesus! Mao kini ang pagtimbaya ni Archbishop Romulo Valles sa tanang bisita ug parokya nga nisimba atol sa Pontifical Mass sa alas 8 sa buntag. Gibendisyon ni Abp. Valles ang mga kandila isip pagsaulog sa kandelarya nga maghatag ug kahayag nga wala nay pagkapalong. Matud pa ni Abp. Valles, mao kini ang adlaw nga gihalad si Hesus sa Templo dinala ang kinaiyag tawhanon. Dungan sa kapistahan sa birhen sa tanang soluso Virgen Delos Remedios nga pinaagi kang Maria nga maoy makatabang kanato sa tanan natong problema ug sa kataposan nanghinaut si Bishop Valles nga ang tanan magpabilin ang kainit sa kasingkasing uban sa Mahal nga Birhen nga maoy magdala kanato sa matuod nga kahayag nga mao si Hesus, nga atong manunubos.

Paghuman sa Santos nga misa gisunod dayon ang parlor games nga larong pinoy ug adunay paniudto ang tanang bisita ug parokyano tungod kay kada distrito gihatagan ni Fr. Silvosa ug baboy aron makakaon ang tanan. Pagkahapon gipahayagan ang folk dance contest nga ang District ang nahimomg kampiyon. Namauli ang tanan nga malipayon tungod sa madagayaon nga pagsaulog sa kapistahan sa Virgen delos Remedios.