Unang pagkalawat gipahigayon

Adunay 282 ka mga bata ang midawat sa Sakramento sa Yukaristiya niadtong Enero 24, 2020 sa parokya sa Miraculous Medal Indangan. Gilangkoban kini sa lima ka mga tulunghaan sa Barangay Indangan ug Barangay Acacia, ang Teofilo V. Fernandez Elementary School, Acacia Elementary School, Chesed School, Amsai ug ang Kristy Dawn College.

Gisugdan ang maong kalihukan sa usa ka input mahitungod sa Pan ug Bino nga gipaambit ni Seminarian Christian John Doldolia Oracion. Nagsugod kini sa alas otso sa buntag. Human sa paniudto gipahigayon ang Sakramento sa Pagkompisal diin adunay upat ka pari nga nagpakompisal sila si Fr. Rowel Quenamague usa ka Franciscan Friar, Fr. Arman Bacalso ug Fr. Jason Cabacaba mga Cavanis Fathers, ug si Fr. Jess Samaniego ang kura paroko sa maong parokya.

Matud pa sa usa ka communicants nga si Donald Pasco Jr. usa ka grade 3 pupil sa Teofilo V. Fernandez Elem. School, nga excited siya sa pagkaon sa lawas ni Kristo kung unsa daw ang lasa niini kay sa higayon nga mosimba siya kauban ang iyang mama mohangyo kuno siya nga motilaw sa hostiya apan wala siya nakatilaw kay dili man siya hatagan sa iyang inahan.

Gisugdan ang Santos nga Misa sa alas tres sa hapon nga gipangulohan sa kura paroko nga si Fr Jess Samaniego.

Dako ang pasalamat sa PSP Ministry sa mga magtutudlo sa mga eskwelahan ug sa mga ginikanan tungod sa ilang pagsuporta sa maong kalihukan. (Anabelle Ejercito Encluna | OLMMP Parish Soccom)