Signature Campaign alang sa Katukuran sa Covered Court Ilusad

Gitakdang ilusad sa Parokya sa Ascension of the Lord ang signature campaign isip usa ka fund raising campaign alang sa katukuran sa covered court sa likod nga bahin sa parokya.

Atol sa Pastoral Forum alang sa mga GKK Servant Leaders gikan sa 36 ka mga GKK sa ALP, gi-presentar ni Mrs. Tita Yuson, ang nangulo sa Ministriya sa Temporalities ug Construction ang signature campaign. Tumong nga pagakab-oton nga kantidad sa maong kampanya mao ang P1 million pesos gikan sa mga GKK samtang laing P1 million pesos gitagana alang sa mga pinili nga mga manggihatagong indibidwal o mga patigayon. Kining maong hugna sa kampanya maoy pagagamiton sa unang phase sa katukuran sa maong proyekto.

Gi-andam na ang mga signature cards nga may pirmahan sa mohatag og donasyon, gikan sa tag-P1, P5, P10, P20, P50, P100, P200, P500 ug P1,000 alang sa paglusad niini sa Pebrero 16, 2020.

“Dako ra ba ni?” pangutana ni Mrs. Yuson sa mga GSL, “gamay ra, basta tabangan natong tanan, ug kinasingkasing nga motampo aron makab-ot ang P1 million pesos,” siya midugang.

Matod ni Rev. Fr. Zenon B. Ampong, kura paroko sa ALP, isulod sa kapsula ang tanang mga pangalan sa unang hugna sa mga donors nga maoy itunton ug ilubong atol sa ground breaking ceremony sa Abril 12, 2020.