San Pedro Cathedral GKK GSL Sending Forth on Feast of the Presentation of the Lord

Diha sa tawag sa pag-alagad o pagbulig sa mga buluhaton dinha sa tagsa-tagsa ka katilingban, ang mga GKK Servant Leaders sa San Pedro Cathedral, nagmadasigon sa pagbag-o sa ilang panaad niadtong Febrero 2, 2020 sa alas 9:30 mass sa buntag nga atol sa Pista nga Pagpakita ni Jesus sa Templo. Kini nagpa-ila nga bisan sa nagkagrabe ang paghaylo sa mga nagkadaiyang kalibutanong kahilayan, kasakitan, ug katalagman, wala kini nakababag sa ilang tinud-anay nga pag-alagad sa simbahan, sumala sa mensahe ni Msgr. Julius Rodulfa ang tinugyanan sa pagpadala sa mga lideres.

Dugang pang mensahe o hagit sa pari ngadto sa mga GSL nga nagbag-o sa ilang panaad, “unsang paagiha kita makatabang sa pagpalambo diha sa atong katilingban, hilabi na diha sa atong pamilya isip piniling katawhan diha sa daghang katawhan”. Nagpahinumdum usab siya nga unta kita mamahimong kahayag, maka limpyo ug maka purify sa katawhan dinha sa katilingban, kay basin mapareho kita sa kandila nga gamay lang huyop sa hangin mapalong dayun.

Daghan kanamo ang nakapamalandong nga dili sayun ang pagpangalagad, bisan pa nga kita gipili apan kung wala ang panabang sa Ginoo wala kitay mahimo. (Rosalinda C. Jabonillo | SPC SocCom)