Sacred Heart FLA, CFC nagpahigayon og Mangrove Planting

Ang parokya sa Sacred Heart of Jesus-Obrero nga gipanguluhan sa Kura Paroko, Fr. Bong Gonzaga, inubanan sa Family and Life Apostolate ilalom sa ilang pangulo nga si Mr. Rolando Villapaz ug Mrs. Delia Villapaz ug Couples for Christ Central A Chapter, inubanan sa ilang representante nga si Mr. Eduardo M. Maglasang, Jr. nagpahigayon og Mangrove Planting. Kining maong kalihokan isa ka pamaagi sa pagtubag sa hagit sa “Pro-Life Month” nga mao ang pag-atiman sa gipiyal kanato nga kinaiyahan. Ang maong kalihokan usab mao ang pinakaunang higayon nga gipahigayon sa parokya nga nahitabo didto sa Bucana, Barangay Lasang, Davao City niadtong Sabado, Pebrero 8. Ang maong kalihokan nagsugod sa alas otso sa buntag pinaagi sa usa ka pag-ampo nga mao ang pamaagi sa pag “send forth” sa mga partisipante. Nakigtambayayong usab ang mga kabatan-onan sa parokya nga maoy nagdala og kabibo sa grupo. Gisalmotan kini sa hapit usa ka gatos nga mga parokyano nga andam ug malipayong nitanom sa kapin 500 nga mangrove seedlings bisan pa sa kalapok sa maong lugar.

Mapasalamaton gayod ang mga parokyano sa Sacred Heart of Jesus kay Barangay Captain Allan P. Simo-ag sa pagtugot niining kalihokan ug sa presensiya sa mga opisyales sa Brgy. Lasang nga nagtabang og giya sa mga nisalmot sa mangrove planting nga mao sila Kagawad Ronnel Simo-ag, Kagawad Ruben Albano, Kagawad Rey C. Joven, Former Kawagad Nestor Gabronino ug Brgy. Staff Alena Gabronino nga wala gayod nibiya hangtod nga wala pa nakalakaw ang tanang nisalmot sa maong kalihokan.

Si Nick Clarence D. Gallego nga isa sa mga miyembro sa SHJP SocCom nagbalita live sa DXGN Spirit FM sa maong panghitabo nianang buntaga.

Ang maong aktibidad nahimong malampuson pinaagi sa pagtambayayong ug pagtinabangay sa tanang parokyano nga niduyog niini.

Gitapos ang mangrove planting sa usa ka salo-salo sa tanang nisalmot niini ug niuli ang tanan dala ang kalipay sa ilang tagsa-tagsa ka kasingkasing tungod kay aduna silay nahimo nga kaayohan sa atong kinaiyahan. (Sacred Heart of Jesus Parish SocCom)