Pangkalibutanong Adlaw sa mga Masakiton Gisaulog

Dungan sa kapistahan sa Birhen sa Lourdes, Pebrero 11, mao usab ang tuig sa pagsaulog sa Pangkalibutanong Adlaw sa mga Masakiton kon “World Day of the Sick” nga gisugdan ni kanhi Santo Papa San Juan Pablo II niadtong tuig 1992. Ang parokya sa St. Mary of the Perpetual Rosary, sa matag tuig nagasaulog niining maong kalihukan pinaagi sa Sakramento sa Pagkumpisal, Sakramento sa Pagdihog sa mga masakiton, ug ang Sakramento sa Yukaristiya.

Atol niining adlawa, Pebrero 11, 2020 sa kapistahan sa Birhen sa Lourdes, adunay 174 ka mga masakiton ug edaran sa nagkalain-laing katilingban sa parokya ang nitambong sa Santos nga Misa nga nakadawat sa sakramento sa pagdihog.

Una gisaulog ang Santos nga Misa gipahigayon ang hamubong katekesis nga gipaambit sa parish formation coordinator, Lina Montilde diin gipasabot niya unsa ang kahulogan sa maong sakramento sa pagdihog ug kinsa ang angayan nga modawat niini. Gisunod dayon ang pagpangumpisal sa alas otso sa buntag ug pagdihog nga gipangunahan sa Kura Paroko, Fr. Dionisio C. Tabiliran kauban ang parochial vicar, Fr. Rey T. Sabuero ug ubang Pari.

Ang Santos nga Misa gipangulohan sa Parochial Vicar, Fr. Rey T. Sabuero nga gi-abagan kini sa Seminarian gikan sa Diocese of Zamboanga nga si Bro. Esper Manginsay diin dinhi siya na assign sa iyang exposure program sa REMASE.

Gipaambit ni Fr. Rey ang mission nga gitahas sa Ginoo sa Birhen sa Lourdes nga unta mamahimo siyang modelo sa pagka-maampoon ug pagsakripisyo nga dili alang sa kaugalingon lamang kondili alang sa mga nanginahanglan. Sumala pa ni Fr. Rey dili na kinahanglan moadto pa sa Our Lady of Lourdes sa France aron mamaayo ang sakit. Ang bugtong buhaton sa magtutuo ang hugot nga pag-ampo, pagtuo ug pagsalig sa Ginoo nga mao ang bugtong Divine Healer kay ang Ginoo nagabuhat og milagro matag adlaw sa katawhan, diha sa pag-alagad sa Ginoo mabag-o ang atong kaugalingon ug kasingkasing.

Nagmalampuson ang maong kalihukan pinaagi sa pagtinabangay sa mga Parish Coordinators, GKK Servant Leaders (GSL), Caritas, Volunteers nga gipangunahan sa Parish Social Action Ministry (PSAM) coordinator, Bro. Joel Corage. (Clinita Nartea, Hermie Mapute | SMPRP SoCCom)