Kalibutanong Pagsaulog Alang sa mga Masakiton

Niadtong Pebrero 11 mao ang kalibutanong pagsaulog sa adlaw sa mga masakiton, diin ang Santo Papa Francisco nag-awhag sa tanang katawhan sa pag-atiman sa mga masakiton, nagaluya, ug gibug-atan sama sa gihimo ni Kristo.

Pinaagi sa kooperasyon ug paningkamot sa mga GKK Servant Leaders (GSL) nga mibisita sa mga balay aron sa pagpangita sa mga masakiton ug tigulang dinha sa tagsa-tagsa ka katilingban, natigum nila ang kapin kon kulang 70 ka masakiton aron maampuan sulod sa katedral. Uban kini sa mainiton nga pag-abag sa atong mga kapulisan pinaagi sa pagpahulam sa ilang mga sakyanan aron mapahigayon ang tanan.

Ubos sa pag-awhag sa atong mga kaparian pinangulohan sa atong mahal nga arsobispo, Romulo G. Valles, D.D., sa mga lideres, natapok ang mga masakiton ug mga katigulangan sulod sa San Pedro Cathedral. Nakadungog ug nakapaminaw ang mga masakiton sa katekismo ug napamalandong unsa ka importante ang mga Sakramento diha sa atong kinabuhi. Anaa usab ang pagpangumpisal una gisugdan ang Santos nga Misa pahinungod kanila nga mga masakiton ug mga katigulangan.

Ang tema karong tuiga sa World Day of the Sick, “Umari kamo kanako, kamong tanan nga gikapoy ug nabug-atan kay kamo akong papahulayun” (Mat 11:28) nag-aghat sa pagpamalandong nga taliwala sa kahuyang ug sala, ang Ginoo andam kanunay nga madawaton. (Rosalinda Jabonillo | San Pedro Cathedral SocCom)