Kahayag sa kalibutan

Feast of the Presentation of the Lord
Mal 3:1-4 / Ps 24:7, 8, 9, 10 / Heb 2:14-18 / Lk 2:22-40

Karong adlawa, nailhan nato nga “kandelarya”. Lain-laing porma ug kolor sa mga kandila atong makita nga gipanalanginan sa pari ug atong gamiton sa atong mga pag-ampo sa balay, simbahan, opisina o bisan asa. Unsa may ipasabot niini? Nganong anaa man ang kadila?

Sa unang pagbasa gipahimangnoan kita nga magpadala ang Ginoo sa iyang sulogoon nga maoy mohinlo sa kalibutan. Siya ang maghatag kahapsay sa nagun-ob nga relasyon, ang magplastar sa nagkagusbat nga kalibotan. Ang kadautan sa pag-abuso sa kaayo sa Ginoo, iyang ipaamgo sa tawo nga nahisalaag.

Sa ikaduahang pagbasa, si Hesus, ang Manluluwas, nagbuntog sa kamatayon ug sala. Siya maoy mopalingkawas sa mga anak sa Dios gikan sa pagkaulipon sa yawa ug sa dautan. Siya nga walay sala naluoy sa tawo nga napukan sa kahuyang ug kasal-anan. Ang walay pagpakabana sa tawo sa iyang isigkaingon, iya nga balusan sa kaayo nga walay tupong diha sa iyang pagpasakit ug pagpakamatay nga mohatod kaniya sa bag-ong kinabuhi sa pagkabanhaw.

Sa Ebanghelyo, ang Balaang Banay, ang Sagrada Pamilya ni Hesus, Maria ug Jose, mipailalom nga mapaubsanon sa nabatasan ug kostumbre sa tawhanong katilingban pinaagi sa paghalad sa batang Hesus didto sa Templo. Kining pakighimamat nila uban kang Simeon naghatod kaniya sa kalipay sa pagkakita sa kahayag nga midan-ag sa tibuok kalibutan. Naghimo kini kaniyang andam na nga moatubang sa Dios Amahan sanglit nakasaksi man siya sa pag-abot sa gisaad nga banag-banag sa kaluwasan sa katawhan.

Kining atong kasaulogan karon naghagit kanato nga diha lamang sa pagpatul-id sa atong relasyon ug dalan nga nadaot tungod sa kahakog, kaibog, pagdumot ug uban pa, mamaayo lamang kung ang kahayag ni Kristo nga nagdawat sa matag usa kanato atong pasigaon. Niining bulan sa kinabuhi, kon Pro-life month, diin kita mag-ampo usab sa mga masakiton, atong susihon kon ang atong relasyon ug pag-ampo sa Ginoo makita ba diha sa atong tininuod nga pagrespeto sa uban. Ato untang madaog ang kangitngit sa garbo, walay pagtinagdanay ug pagpaniguro lamang sa kaugalingon. Mahimo unta kitang kahayag pinaagi sa malipayon nato nga pagsabot ug pagdawat nga maalagaron sa usa’g usa.