Inisiyatibo mahitungod sa “Ecumenism, Interreligious Dialogue and Indigenous Peoples”, gisugdan sa Our Lady of Fatima Parish

Usa ka garbo ug kadaugan na usab ang natagamtaman human sa malampusong panagtigum niadtong niaging dominggo mahitungod sa “inter religious dialogue” isip pamaagi sa pagkab-ot sa kalinaw.

Giimbitahan sa Parish Pastoral Council leaders ug sa Kora Paroko sa Our Lady of Fatima Pairsh nga si Rev. Fr. Ben Capulong si Muslim Leader Aleem Adilao ug ang iyang anak na si Nor Asiah Adilao nga magpulong aron sa pagbalik-lantaw sa mga inisyatibo alang sa kalinaw, pagtuki sa kasamtangang kahimtang, paghisgot kung unsay sunod nga lakang ug pagpalig-on sa mga nahisakop sa kumunidad nga nangandoy sa kalamboan ug kalinaw ilabina sa mga magtutuong Kristiano, Muslim ug Lumad.

Usa sa mga nahagpat sa mga gipaambit panahon sa panagtigum nga, ma Kristiano o Muslim, ang tanan biktima gayud sa kagubot, tungod sa kakulang sa pagsinabtanay. Mao nga molihok gyod alang sa pagsolbad sa problema diin apiktado ang tanan.

Usa sa mga lakang nga pagabuhaton karon mao ang pag-aghat sa mga katawhan nga mahimong kabahin sa pagsabwag sa kalinaw, ilabina sa mga kabatan-onan ug sa pagpadayon sa pagpahiluna pa gayud sa mga dialogo sa umaabot. Daghang makatandog nga mga pulong ang nalitok sa mga baba sa mga nitambong sa maong tigom. Kini nagpasabot lamang nga lawom ang ilang pagpakabana sa maong kahimtang ug lig-on ang ilang baruganan sa pagpatunhay sa kalinaw ug kalamboan ug sila dasig gayud nga mohimo sa ilang bulohaton aron dunay konkretong lihok ang ilang mahimo.

Duha ka prioridad ang ilang gipunting. Ang una mao ang pagpahigayon og forums sa mga Kristiano uban sa mga muslim leaders ug mao usab sa mga muslim kauban ang mga Christian leaders, kini usa ka lakang sa pagpasabot sa kanya-kanyang pagtuo aron makab-ot ang pagrespeto sa usag-usa ug ang kalinaw sa katilingban. Gidasig ni Aleem Adilao nga dili lang nato kini buhaton pahanon sa tuig sa “Ecumenism, Interreligious Dialogue and Indigenous Peoples” apan sa umaabot pa nga katuigan.

Ang katapusan nga napunting nga prioridad sa maong panagtigum mao ang pagpadayon sa mga kalihokan tali sa dialogo nga makapasayon sa pagkab-ot sa kahiusahan taliwala sa mga makasaysayanong mga hitabo sa dugay na nga panahon. Ang mga, imam, ustads, pari, ug mga religious leader maoy gi-awhag nga mopasayon niini.

Tungod sa katuyuan nga makab-ot ang tunhay nga pagsinabtanay ug kalinaw, ang mga lideres sa Our Lady of Fatima Parish ug Muslim Leaders sa katilingban nagkahiusa sa paglig-on sa koneksiyon sa usag-sa ug paglihok sa mga buluhaton nga nahuna-hunaan aron dunay sangputanan ang mga inisiyatibo sa pagpalambo sa liso sa kalinaw. (Novie Ramos | SoCCom OLFP)