Pagsaulog sa ika-15 nga kapistahan sa Parokya sa Sagrada Pamilya

Gisaulog sa Parokya sa Sagrada Pamilya ang ika-15 nga kapistahan niadtong Disyembre 29, 2019, ang Dominggo paghuman sa Pasko. Sa bisperas sa pista gipahigayon ang prosesyon sa tanang patron sa GKK pagkahuman sa katapusang novena mass nga gipangulohan ni Fr. Roger Duhaylungsod, DCD, Kura Paroko.

Gikalipay usab sa mga parokyano ang pakigkuyog sa Davao Catholic Herald ug 89.9 Spirit FM nga nagpadula ug nanghatag og premyo. Paghuman sa kalingawan, nagsalo-salo ang mga parokyano. Gisaw-an nila ang mga putahe nga ilang giandam gikan sa karne nga gipangapod-apod ni Fr. Jing sa matag GKK. Nindot kaayo nga sud-ungon ang mga tawo nga nag-inambitay sa ilang mga giandam.

Paghuman sa paniudto, nangandam na usab ang tanan alang sa gipahigayon nga Ginoo at Binibini ng Parokya nga gipresentahan sa 5 ka sona. Ang nidaug sa maong search alang sa ginoo ng parokya mao si G. Roman Noel Ilustrisimo gikan sa zone 6 ug ang binibini mao si Bb. Cindy Tabaque gikan sa zone 2.

Disyembre 29, gipahigayon ang pontifical mass nga gipangulohan ni Arsobispo Romulo G. Valles, DD. Sa iyang homiliya iya nausab gibalik ang paghatag og importansya sa Belen diin makita ang hulagway sa sagrada pamilya nila ni Hesus, Maria ug Jose.

Ang maong misa gi-cover live sa 89.9 Spirit FM-Davao. Sila Ms. Imelda Gamale ug Mrs. Leony Tinambacan ang nahimong anchor sa maong coverage.

Adunay salo-salo ang gipahigayon paghuman sa santos nga misa. Aduna usab mga food packs nga gipanghatag sa mga tao nga giandam sa mga lideres sa parokya.

Nagpasalamat ang pastoral team sa pagpangulo ni Fr. Jing sa tanang mga tawo, indibidwal ug organisasyon sa pagtabang aron mahimong malipayon ug malampuson ang pagsaulog sa ika-15 nga kapistahan sa Parokya sa Sagrada Pamilya sa Brgy. Dumoy ug Baliok. (Flor Arellano-Deloria | Holy Family Parish SoCCom)