Ang kahayag midan-ag

Gibisita ni Arsobispo sa Davao ug CBCP President, Most Rev. Romulo G. Valles, D.D., ang mga lumilihok sa Apostolado sa katilingbanong komunikasyon atol sa ilang Christmas gathering didto sa Mergrande, Enero 5, 2020.

“Walay sama niini nga mga SoCCom nga gikan sa mga GKK ang makita sa tibuok Pilipinas. Dili ni panghambog ha. Nga naa tay taga Malabog, taga Agdao o taga Baliok, nindot nga pamaagi,” kini ang unang mga pulong ni Arsobispo Valles sa iyang mensahe kanila. Iyang nakita nga sa atong DXGN 89.9 Spirit FM ug sa Davao Catholic Herald “dunay mga batan-on, ug duna puy mga hamtong nga gikan gyud kanato… Bisan og naa pa kitay daghan nga kwarta, ug makakuha tag professional nga mga anchors, dili gihapon kana garbo nato sama nga duna gyuy gikan sa atoa mismo bisan dili kaayo hawod.”

Dugang niya nga ang papel sa mga social communicators ug kitang mga magtotoo mao nga magdala kita sa kahayag. “Wala magpasabot nga sa atong paghimo og balita, dili na nato iapil ang mga kalisod ug sayop nga nahimo sa katilingban, apan diha sa mga daw kangitngit nga kasinatian, atong makita ang kahayag ni Kristo,” miingon ang Arsobispo. Iyang gihagit ang mga SoCCom nga taliwala sa mangitngit nga kasinatian sa katawhan, mapalapnag ang kamot sa Ginoo nga naglihok ug nagdala og paglaum ug kalingkawasan sa katawhan.

Gikalipay usab ni Arsobispo Valles nga natigayon gihapon ang maong party isip pasalamat sa mga lumilihok bisan pa man sa nasinati nga linog sa atong mga igsuon sa Dioceses sa Digos ug Kidapawan. “Kausa lang man ni nga pasalamat sa tibuok tuig, ug nasayran nako nga medyo simple ang inyong party karon kay inyong gibahinan og hinabang ang mga biktima sa linog, maayo kini nga panghunahuna,” miingong siya.

Nadasig gayod ni Arsobispo Valles ang mga SoCCom, anchors, staff ug volunteers pinaagi sa iyang presensiya ug pagpanghatag og kendi dugang sa mga ginagmay nga pahalipay sa mga nanambong. Naglaum sa Arsobispo Valles nga aduna gayoy naminaw sa atong radyo nga matandog ug malig-on sa ilang pagtoo. Kitang mga magtotoo, ilabina ang mga naglihok sa Simbahan nagdala sa kahayag ni Kristo nga modan-ag sa tanan.