Ang kagahapon, nagpugong kanako!

Ako si D.G. nga nagpuyo dinhi sa siyudad. Nagtrabaho ako sa usa ka kompanya. Sa bag-o pa lamang ako sa kompanya, nakatagbo ako sa usa ka lalaking nahimong uyab. Tungod kay gihigugma ko siya, gihatag ko ang akong pagkababaye human sa pipila ka bulan sa among panag-uban. Sa kadugayan nagbulag kami tungod sa daghang mga hinungdan.

Sa pagkakaron, adunay nangulitawo kanako nga batan-on pa kay kanako ug duha ka tuig. Sobra siya ka buotan, nga bisan, kanunay ko siyang awayon, nagpasensya lang gihapon siya kanako. Nahigugma kaayo ako kaniya, labaw pa kay sa akong unang uyab. Tungod sa akong pagsalig kaniya, ako na usab gihatag ang akong pagkababaye ngadto kaniya. Sa akong katingala, wala siyay komento mahitungod sa akong pagkaputli. Nag-propose na siya nga buot siyang mangasawa kanako, apan nagduha-duha ako sa labing gikahadlokan ko nga akong nabuhat nga paghatag sa akong pagkababaye ngadto sa unang uyab ko, nga hangtud karon wala ko pa ibutyag. Dili ko buot nga biyaan niya ako, tungod kay nakita ko na karon nga siya na gayud ang gusto nakong mahimong kapikas sa kinabuhi, tungod sa iyang pagkabuotan.

D. G.

* * * * * *

Dear D.G.,

Ang labing dakung komedya nga mahitabo, sa diha nga moandar na ang gugma sa matag kasingkasing mao kini. Ipakita kanato sa samang higayon unsa kaanindot ug kamaksot, unsa ka-pinangga ug sa kamubo sa dungog diay sa tawo. Ang labing malisod nga gipangayo sa gugma ngadto sa tawo mao nga kinahanglan maghunahuna siya nga siya maanyag og pinangga. Kon mao kini ang panglantaw sa usa ka babaye sa iyang kaugalingon, dili gayud siya magpaka-mubo og dungog o cheap. Tungod niini ang usa ka babaye nga nagpangidaron ug 19, dili gayud mopaubos sa kaugalingon aron mamahimong wala nay dungog. Gawas kon buot sa usa ka babaye nga makit-an siya sa iyang hinigugma nga siya diay babayeng mubo og dungog sama sa iyang pagtan-aw sa iyang kaugalingon. Busa ang labing maayo mao ang pagtago sa iyang nangagi sa iyang kaugalingon. Kon buot diay usab nga ang iyang relasyon magmalipayon ug magmalahutayon, maningkamot siya nga mamahimong angayan sa gugma nga gihalad kaniya. Nagkahulugan kini, nga maningkamot siya nga mamahimong matinud-anong babaye ug dili maghimo ug mga pagsulay sa iyang hinigugma. Tinuod, kon ang babaye magpaka-aron ingnon, sa pagsulay sa lalaki, kon siya mismo pakyas man usab sa maong pagsulay. Dili kaha kita maulaw o nagpakita lang kita nga ‘immature’ pa. Ania ang akong bahin sa imong pangutana: Samtang imong gihuptan ang kamubo sa dungog sa imong kaugalingon, ang listahan sa imong mga daghang kakulangan motaas pa gayud ug mahimong mabug-at pas-anon. Sama nga nawala ang una mong hinigugma, mahimong mawala-usab ang imong ikaduhang gihigugma karon. Hinaut nga magpabilin kang babayeng maanyag, pinangga, ug katahuran diin ang matuod nga gugma maanaa kanimo.

Sister