Panamilit sa karaang Simbahan

Katapusang higayon sa panagtapok sa mga GSL alang sa pagpangandam sa umaabot nga ika-15 nga kapistahan sa parokya. Kini gipahigayon sa Parish Social Hall niadtong Disyembre 15.

Emosyonal nga gihandom sa mga pangulo ang labing unang misa nga gipahiyagon sulod sa maong gambalay niadtong Disyembre 15, 2004 kay mao man ang kanhing simbahan sa Sagrada Pamilya.

Pipila katuig ang nilabay, pinaagi sa pagtinabangay ug paningkamot sa mga parokyano ubos sa giya sa kura-paroko nga si Fr. Henry Campeon, DCD, natukod ang kasamtangang dakong simbahan. Ang kanhing gamay nga simbahan gihimo nga function hall nga tapukanan sa mga parokyano alang sa mga aktibidad sama sa seminar, meeting, recollection, party, medical mission ug uban pa.

Disyembre 16, 2019 sugdan na ang pagguba sa karaang gambalay aron sa pagtukod sa bag-ong proyekto nga pastoral building. Ipahiyagon ang Ground Breaking Ceremony sa Disyembre 28, alas 8 sa buntag, disperas sa ika-15 nga kapistahan sa parokya.

Mingaw nga gisud-ong sa mga parokyano ang karaang simbahan nga maoy timaan sa pagsugod sa parokya.

Mapapas man ang karaang simbahan apan magpabilin sa kasingkasing sa mga katawhan sa Sagrada Pamilya ang ilang nindot nga kasinatian sama na lamang sa bunyag, kasal, kompirma, pista, pasko ug mga misa matag Dominggo.

Usa nanguli, nanguha og hulagway ang pipila aron handumanan sa karaang simbahan. (Flor Arellano-Deloria | SoCCom HFP)