Pagkinabuhi sa pagka-piniyalan gipuy-an sa mga taga ICC GKK

Dako na ang nahimong kabag-ohan sa Kristohanong Katilingban sa Imakulada Konsepsyon, Matina Gravahan karon nga nagsaulog kini sa ika-56 ka tuig nga kapistahan.

Gawas sa bag-o nga kapilya, daghan na usab ang mibalik sa pagka-aktibo sa mga kalihukan sa GKK ilabina sa pagka-piniyalan.

Gikan sa 18 ka mga piniyalan niadtong tuig 2017, mitubo kini ngadto sa 27 ug nahimong 36, 52 ug karon 62 na ang mitahan sa ilang mga kaugalingon.

“Dako kaayo ang nahimong kabag-ohan sa mga taga ICC Gravahan,” gisaysay sa pangulo sa Katilingban nga si Jimmy Libres, kinsa kaniadto usa sa mga nag-obserbar sa pamaagi sa Spirituality of Stewardship (SOS).

“Kaniadto, lisod kaayo pasabton ang mga kaubanan nga angayang tabangan ang pagtukod ug usab sa kapilya nga gi-anay na,” siya midugang. “Apan sa dihang nasabtan na nila ang pagka-piniyalan, sila na mismo ang moboluntaryo nga mohatag aron nga mahuman ang kapilya.”

Namatikdan usab nga dunay pag-usbaw sa halad matag Kasaulogan sa Pulong ilabina panahon sa Misa diin ang mga mohalad atol sa Offertory personal nga mohatag sa mga stewardship envelops ngadto sa nangulo sa Santos nga Misa nga pari.

Ning ika-56 nga kapistahan usab, dakong kalipay sa mga ginikanan kansang mga anak wala pa nila napabunyagan sanglit gipahigayon man ang mass baptism atol sa kasaulogan sa Fiesta Mass niadtong Disyembre 7, 2019 nga gipanguluhan mismo sa kura paroko nga si Fr. Zenon Ampong.

Singkwentay tres ka mga bata ang nakadawat sa Sakramento sa Bunyag niadtong higayona pinaagi sa tabang usab sa mga GKK Servant Leaders ug sa mga staff gikan sa Ascension of the Lord Parish, isip pagpadayag sa kahiusahan ug kalambuan alang sa piniyalang katilingban sa ICC GKK.