Pag-atiman sa kabuhatan, sa mga GSL dut-an

Estriktong gipatuman sa Ateneo De Davao University (ADDU) Director, Mr. Ricky Enriquez, ang pag-atiman sa kabuhatan atol sa pagsaulog sa ika-70 nga anibersaryo sa simbahang lokal sa Davao, Disyembre 7, 2019.

Sa duol 7,000 ka mga partisipante nga mga GKK Servant Leaders (GSLs), obispo ug kaparian nga mitambong sa maong tigom sa ADDU Senior High School Campus, Bangkal, Davao City, dili makasulod ang dunay mga bitbit nga plastik nga botelya sa mineral water nga ilabay dayon human sa usa ka gamit. Dili usab makasulod ang mga straw, putos nga plastic gawas sa balot gayod sa maong pagkaon sama sa biscuits, plastic nga taklob ug ubang plastik nga kausa lamang magamit.

Bawal usab ang paglabay sa mga tisyu diha sa bowl sa kasilyas ug pagkalas-kalas sa tubig. Kon nahimo, tanang mahimong basura nga bitbit daan sa pagsulod sa maong campus angayan bitbiton og balik paggawas o kaha ilabay sa saktong basurahan.

Dili usab makasulod ang walay I.D. bisan pari, isip kabahin sa security. Walay angayan mag post og picture sa Facebook gawas lang sulod sa covered court diin gihimo ang kalihukan.

Matod pa ni Mr. Enriquez, “dili kini pagpalisud kaninyo, apan tumanon lang nato ang paningkamot sa ADDU sa pagmugna og kultura nga mag-atiman sa kabuhatan.” Bisan kuno usa ka adlaw ra kining kalihukan, makasilsil kini sa hunahuna sa mga GSL ang seryosong paglikay sa kadaut sa mga basura nga walay responsibilidad nga paggamit, ilabina sa mga plastik.

Ang maong katikaran gihimo dili sa saktong petsa nga December 17 tungod sa misa de gallo. Gilusad usab niini ang ika-75 ka kasumaran sa Davao isip lokal nga simbahan.