OLMMP nagsaulog sa Ikanapulo ka Tuig nga Kapistahan

Niadtong adlaw sa Myerkules ika 27 sa bulan sa Nobyembre 2019, gisaulog sa parokya sa Our Lady of the Miraculous Medal ang ikanapulo ka katuigan sa pagtukod sa maong parokya. Adunay duha ka Santos nga Misa nga gipahigayon. Ang unang misa gipahitabo sa alas 6 sa buntag diin gipanguluhan sa priest presider nga si Rev. Fr. Hernane Francisco Gallan, kanhing seminarian nga taga Diocese sa Ipil, Zamboanga Sibugay nga na assign niining parokyaha.

Ang ikaduhang misa o ang Pontifical Mass gisaulog sa alas 9 sa buntag diin gipangulohan kini ni Msgr. Martiniano Gorgonio ang unang kura paroko sa OLMMP. Ang kasamtangang kura paroko sa maong parokya nga si Rev. Fr. Jesus Samaniego ni concelebrate usab sa maong kasaulogan.

Gisaysay ni Msgr. Matt ang brief history sa maong parokya tungod kay siya nahimo man nga kabahin sa katukuran niini. Matud pa niya dili unta siya ang pari nga ma assign pag una apan kay wala man modawat ang gitahasan niini siya na lamang ang miboluntaryo nga mamahimong unang kura paroko. Iya usab gisaysay nganong mao kini ang patron sa parokya. Ang maong patron kagustuhan sa tag iya sa luna sa parokya nga si Msgr. Maximo Sarno, diin daku ang kalabutan niini sa iyang kinabuhi ug gitugutan usab sa kanhing obispo nga si Archbishop Emeritus Fernando Capalla, nga mao kini ang pagahimoong patron sa parokya.

Ang pontifical mass gisaulog sa kapilya sa St. Joseph the Worker Gkk, Molave Homes tungod kay ginasugdan na ang pag construct sa church building didto sa luna nga gi donate ni Msgr. Sarno, ug gani pipila na ka kapistahan ang gisaulog didto ug karong ikanapulo nga kapistahan nibalik na usab sa maong kapilya.

Sulod sa maong misa, gipasalamatan ni Msgr. Matt ang mga tawo nga nahimong kabahin sa pagtukod sa maong simbahan ug nanghinaut siya nga magmapadayonon sila sa pagtabang sa parokya. Sa maong misa ubay-ubay usab ang mga bisita nga nanimba, usa ang grupo sa mga kamadrehan sa Daughters of Charity nga diin mao kini ang congregasyon ni St. Catherine Laboure kinsa mao ang founder niining patron Birhen Medalla Milagrosa. Gipasabot sa usa ka madre ang kamahinungdanon sa maong medalyon ug nanghatag usab sila niini sa mga katawhan nga anaa sa simbahan.

Human sa kasaulogan adunay parlor games nga gipahigayon didto sa parish ground nga gipanguluhan sa mga youth ministry ug na bibo kini tungod sa padula ug papremyo sa Dxgn 89.9 Spirit Fm nga gipangunahan ni Big Brother Brandy. Sa ala una sa hapon gisugdan ang Kasadra contest ug ang coronation sa Little King and Queen of OLMMP. Bisan sa kakusog sa ulan wala nahunong ang pagselebrar sa kapistahan kay nagpadayon gayud kini.

Adunay lechon contest nga gihimo diin giapilan kini sa matag sona. Mapasalamaton ang kura paroko nga si Fr. Jess sa positibong tubag sa mga parokyano ug nanghinaut siya nga magpadayon kini ug mahuptan ang tema niining tuiga, ” Birhen Maria, Giya ug Inspirasyon sa Kalambuan sa Buhat ug Pagtoo.” (Anabelle Ejercito Encluna | OLMMP Parish Soccom)