Misyon sa Adbiyento: Pagkabalaan

Advent Mission: Be Holy! Ang unang Domingo sa Adbiyento maoy timaan nga nagsugod na ang bag-ong kalendaryo sa liturhiya sa simbahan. Niining higayona maoy panahon sa pagpangandam sa mga magtotoo sa ilang kaugalingon sa pagkatawo ug pag-abot sa atong manluluwas nga si Hesus.

Aron mabungahon ang pagpangandam sa pagpaabot sa atong Ginoong Hesus, gi-awhag ang matag pamilya sa nagkadaiyang katilingban sa St. Mary of the Perpetual Rosary Parish, sa pagbag-o sa pagtoo ug pagpamalandong pinaagi sa pag-ampo, pagpuyo sa pagkabalaan, pagbuhat sa mga butang nga makapahimoot sa Diyos ug pagdawat sa mga sakramento.

Tungod niini gihangyo sa Kura Paroko, Fr. Dionisio Tabiliran ang mga miembro sa matag Gagmay’ng Kristohanong Katilingban (GKK) sa parokya nga mag-ampo panahon niining adbiyento hangtud sa pagkatawo sa batang Hesus. Mao kini ang gitawag nga “Alay Pamasko” mga pag-ampo nga ipahigayon sa mga panimalay sa mga miyembro sa matag GKK diin pangulohan kini sa mga Tigpasayon Pundok Banay.

Atol sa Santos nga Misa sa alas 9:30 sa buntag niadtong Domingo, Disyembre 1, 2019 gipahigayon ang pagbendisyon sa mga “advent wreath” nga maoy gamiton sa matag pamilya diha sa “Alay Pamasko” . Napahigayon kining mga pagbuhat sa mga “advent wreath” pinaagi sa pakig-alayon sa mga Pangulo sa Alagad diha sa ilang tagsa-tagsa ka mga GKK diin gipangulohan kini sa Parish Social Action Ministry coordinator, Joel Corage. Mapasalamaton ang Kura Paroko, Fr. Dionisio Tabiliran sa mga GSL ug miyembro sa mga GKK sa pagtubag sa maong kalihukan. (Hermie Mapute | SMPRP SoCCom)