Immaculate Conception-Samal Island 67th Fiesta

Dungan sa ika-duhang Dominggo sa Adbiyento December 8, 2019 gisaulog sa parokya sa Immaculada Concepcion ang ika-67 nga kapistahan sa maong parokya nga adunay tema: “Ang pagkamasinugtanon sa kabubut-on sa Dios ni Maria, panig-ingnan nato alang sa maayo ug mahiusahong relasyon sa mga tawo nga lahi og pagtoo kang Cristo, ug sa mga wala’y pagtoo Kaniya ilabina sa mga lumad.”

November 29, 2019 gisugdan ang unang adlaw sa Nobena Misa, ug base sa naandang tradisyon nagapahigayon og pasundayag matag gabii human niining Nobena Misa. Ang mga empleyado sa LGU ang unang mipasundayag dungan sa unang Nobena, ug gisundan kini sa mga eskwelahan nga nahisakop sa Distrito sa Samal. December 7, 2019, Sabado, nahitabo ang prosisyon ug gisundan kini sa ikasiyam nga Nobena Misa apan wala’y nahitabong pasundayag alang sa espirituhanong pagpangandam.

Duha ka Santos nga Misa ang gisaulog sa adlaw sa kapistahan sa Immaculada Concepcion. Ang unang misa nahitabo alas 6 sa buntag nga gipangulohan ni Rev. Fr. Hernan Batomalaque, ang visitor priest sa maong parokya. Ang ikaduhang misa o Pontifical Mass gisaulog sa alas 9 sa buntag, gipangulohan ni Most Rev. Romulo Valles, obispo sa Davao uban sa kura paroko nga si Rev. Fr. Romel Banilad, uban usab ni Rev. Fr. Hernan Batomalaque ug Rev. Jay-Ar Gubac.

Nagpadayag sa kalipay ang Arsobispo sa nakita nga mga pisikal nga kabag-ohan nga nahitabo sa parokya, uban sa pagpasalamat sa tanang mga tawo nga nagsaulog sa maong kapistahan. Iya usab gipalawan ang pagkamasinugtanon sa Mahal nga Birheng Maria sa pagtubag sa giingon sa anghel kaniya diin ang iyang tubag, maoy nahimong sinugdanan sa mga plano sa Diyos ngari kanato. Nagpasalamat usab ang Arsobispo diin nakita niya nga daghang mga kabataan ang misalmot sa selebrasyon. Dungag pa niya nga kini indikasyon nga kung magpadayon kita sa pag-agak sa matag usa, mamahimo kitang magmadaugon kauban ang atong Dios.

Human sa maong Pontifical Mass nisunod ang bunyag, ug ang panagtapok sa tanang GKK nga nahisakop sa parokya. Nalingaw usab ang mga katawhan tungod sa Fiesta Caravan nga gihimo sa DXGN ug sa Catholic Herald ingon man sa 3 on 3 basketball nga gidula sa mga GSL nga gi-organisa sa mga PSB. Labaw pa nga nagmasadya ang kapistahan tungod giduaw ang Isla sa sikat nga banda nga Kamikazee. Matod pa ni Hon. Gie Arr Valdez, konsehal sa Isla nga mao’y nag-organisa nga kini usa ka concert for a cause, diin ang proceeds giingong ihatag sa parokya sa Immaculada Concepcion, ug sa mga nahimong biktima sa linog. Nahimong hapsay ug puno sa panaghiusa sa gugma sa Dios ang ika-67 nga kapistahan. Busa gikalipay kini sa kura paroko nga si Rev. Fr. Romel Banilad nga galaum usab nga mapuy-an ang maong tema niining tuiga. (Honey H. Abrigo)