Ika-70 nga anibersaryo sa Arkidiyosis sa Davao saulugon

Ang ika-70 nga anibersaryo sa Arkidiyosis sa Davao saulugon didto sa Ateneo de Davao University Senior High School campus karong Disyembre 7, 2019.

Sumala sa BEC Lay Coordinator ug Pastoral Worker nga si Ma’am Vicky Estoque Anghag, ang panagtigom gilauman nga adunay kapin sa 7,000 ka mga partisipante gikan sa 1,800 nga Gagmay’ng Kristohanong Katilingban (GKKs) sa 39 ka mga parokya sa Arkidyosis sa Davao. Gilaumang mangabot ang mga partisipante sugod alas 6:00 hangtod 6:30 sa buntag.

Adunay upat ka tumong sa umaabot nga kalihukan: una, usa kini ka dakong panagtigom sa mga GKK Servant Leaders (GSLs); ikaduha, kini ang pagtapos sa pagsaulog sa Tuig sa Kabatan-onan (Year of the Youth Celebration); ikatulo, ang pag-abli alang sa Tuig sa Ecumenism ug Interreligious Dialogue ug Indigenous Peoples; ug sa katapusan, sa panahon sa kalihokan, ilunsad na ang ika-75 nga anibersaryo sa Archdiocese sa Davao.

Ang tinuod nga petsa alang sa ika-70 nga Anibersaryo mao ang petsa 17 sa Disyembre pa. Pero ang Arkidiyosis sa Davao naghatag daan og panahon alang sa pagsaulog sa Misa de Gallo nga gikatakda nga duol ra sa petsa. Kini aron mahatagan og oras sa pagpahulay ang mga GSLs.

Adunay mga pagpaambit gikan sa piniling mga “sharers” ang madungog. Ang pag-ambitay sa mga pagkaon atol sa paniudto mahitabo usab. Ug ang Santos nga Misa saulogon sa dili pa matapos ang maong kalihukan. Ang maong kalihukan gikatakda nga matapos mga alas 4 sa hapon sa parehong adlaw. (Julie Mae Taguno, Sheila Mae Sumagang & Robert Ramirez | Sta. Ana National High School)