Halandumon nga kasinatian sa mga batan-on

Nahimong halandumon alang sa mga batan-on sa St. Mary of the Perpetual Rosary Parish ang pagsaulog sa Tuig sa mga Batan-on diin gitak-op kini pinaagi sa Parish Youth Camp (PYC). Gipahigayon ang PYC kaniadtong Oktubre 28-30, 2019 nga adunay tema: “Kabatan-onan ni Santa Maria: Hinigugma, Gigasahan, Gipiyalan og Gahum”. Gipahimutang ang camp site sa mga partisipante sa Shrine of Our Lady of the Most Holy Rosary sa Buhangin. Adunay kapin 150 ka mga batan-on ang nitambong sa maong PYC diin nagagikan sa mga Gagmay’ng Kristohanong Katilingban (GKK) nga nahisakop sa Zona uno hangtud diez.

Gisugdan ang kalihukan sa PYC pinaagi sa pagsaulog sa Santos ng Misa nga gipangulohan sa Parochial Vicar, Rev. Fr. Rey T. Sabuero. Gisunod dayon ang pagpaila-ila sa mga partisipante sa kada zona pinaagi sa paghimo og parada ug orientation nga gihatag ni Glenn Lagare.

Adunay mga gi-imbitar nga mga personalidad nga maoy nagpaambit sa ilang kasinatian ug kahibalo sa maong tema sa pagsaulog sa tuig sa mga batan-on. Gipasabot sa Director for External Affairs sa Holy Cross of Davao, Armand Dura sa mga batan-on isip mga “hinigugma”. Gipaambit ni Errol James Santos sa Ascension of the Lord Parish ang mahitungod sa mga batan-on isip mga “gigasahan” ug ni Jonalen Asares, Parish Youth Ministry Coordinator isip mga “gipiyalan og gahum”. Ang mga facilitators sa maong kalihukan mao ang mga seminarista nga nagagikan sa St. Francis Xavier College Seminary.

Madasigon nga nagpartisipar sa mga nagkadaiyang aktibidades ang mga batan-on sama sa praise and worship nga dinuyogan sa youth for Christ, Marian procession, festival night ug youth jam. Adunay mga ball games, parlor games diin nasukod ang ilang pagka makiangayon sa matag-usa.

Nakig-uban usab ang Kura Paroko, Rev. Fr. Dionisio C. Tabiliran sa mga batan-on pinaagi sa pagsaulog sa Santos nga Misa sa ika-duhang adlaw sa maong parish youth camp.

Mapasalamaton si Jonalen Asares, parish youth ministry coordinator sa makanunayong suporta sa mga GKK Servant Leaders sa mga nagkadaiyang Zona ilabina sa Kura Paroko, Fr. Dionisio Tabiliran ug sa PYM Spiritual Director, Fr. Rey Sabuero diin nagmalampuson ang tulo ka adlaw nga PYC.

Mapasalamaton ang tanan sa serbisyo sa San Pablo QRT ug sa St. Mary Action Response Team (SMART) aron sa pagmentinar sa seguridad sa mga partisipante sulod sa camp site.

Isip pagtapos sa tulo ka adlaw nga kalihukan gisaulog ang Santos nga Misa nga gipangulohan ni Fr. Rey Sabuero. Gidasig ug gipasalamatan sa parochial vicar ang mga batan-on nga nitambong sa parish youth camp ug working committees nga magpadayon sa pagsiga ang kalayo sa ilang pagserbisyo sa Ginoo pinaagi diha sa pag-aktibo sa ilang nagkadaiyang GKK ug sa Parokya.

Pinaagi niining pagsaulog sa Tuig sa mga Batan-on nahatagan ang mga kabatan-onan sa mga bag-ong kasinatian nga mamahimong makadasig kanila diha sa pagserbisyo ug sa pagpadayon sa pagtubo sa ministriya sa batan-on ilabina ang pagpuyo sa kinabuhing Kristohanon. (Mae Villanueva, PYM | Hermie Mapute, SMPRP SoCCom)