GSL – Advent Recollection gipahigayon

Gipahigayon ang Advent Recollection alang sa mga GKK Servant Leaders (GSL) sa mga Gagmay’ng Kristohanong Katilingban (GKK) nga nahisakop sa Parokya sa St. Mary of the Perpetual Rosary niadtong November 25 & 27, 2019. Gi-awhag sa Kura Paroko, Fr. Dionisio C. Tabiliran ang tanang mga GSL nga motambong sa maong advent recollection isip pagpangandam sa ilang kaugalingon sa umaabot nga GSL renewal ug sending forth aron sila andam nga mo-alagad sa ilang tagsa-tagsa ka katilingban.

Ang recollection master nga si Fr. Christopher Concepcion. TOR nigahin og panahon aron ipaambit sa mga GSL ang maong pagpangandam sa ilang kaakuhan isip mga GSL sama sa pagpangandam sa panahon sa adbiyento. “Umanhi ka Mesiyas uban kang Maria”, mao kini ang tumong sa gipaambit ni Fr. Cris. “MARANA ‘THA!” ‘Uban ni Maria’. Kulang ang pagsaulog sa adbiyento kung wala si Maria.

Kitang mga GSL dugay na natong nasinati ang adbiyento tungod kay ang atong tibuok kinabuhi kanunay nga nagpa-abot kung unsa na sad ang mosunod nga mga misteryo nga mahitabo. Matod pa, ang kinabuhi sama sa misteryo sa santo rosaryo diin adunay kalipay ug kasakit; may paglaum human sa mga kasakit ug moabot ang himaya ug ang kahayag. Uban ni Kristo, ang tinuod nga kahayag sa kalibutan ug katawhan. Matud pa sa madre nga Puerto Rican, “Advent is the season of light, beauty, expectation and hope”. Panahon diin adunay kahayag, kaanyag ug paglaum. Mao kini ang diwa sa adbiyento.

Si Hesus misaad nga siya mobalik aron sa pagkuha kanato. Andam ba kaha kita sa pagdawat kaniya isip hari sa atong kinabuhi? Sama ni Maria, wala pa siya nasayod nga siya ang mamahimong inahan sa mesiyas apan daan na siya nag-ampo ug naglaum nga moabot na ang manluluwas sa kalibutan. Sa dihang gisultihan siya sa anghel nga mamahimo siyang inahan sa mesiyas, iyang gidawat kini sa walay pagmakuli. Isip mga GSL unta sundon nato ang mga maayong hiyas ni Maria sa pagkamapaubsanon, pagkamaloloy-on, pagkamatinabangon ug pagkamatinud-anon ug isangyaw sa kalibutan nga si Hesus mao ang hari sa mga hari. (Clinita Nartea & Hermie Mapute | SMPRP SoCCom)