Bishop Medil Aseo, D.D.: “Ang gugma ni Kristo walay katapusan ug utlanan”

Naghiusa ang Diosesis sa Tagum ug midagsa sa Santos nga Misa nga gipahigayon atol sa Solemnidad ni Kristong Hari didto sa Parish of Christ the Eucharistic King nga gipanguluhan ni Most. Rev. Medil Aseo, D.D., Obispo sa Tagum, alang sa selebrasyon sa ika-70 nga parochial fiesta niadtong Nobyembre 24, 2019.

Sa iyang wali si Bishop Aseo nagpahinumdom sa unang pagbasa nga si Haring David ang giilang hari sa mga Israelita. Siya misumpay nga sa Ebanghelyo, ang mga tawo nagbiay-biay ni Kristong Hari diha sa iyang pag-antus sa krus alang kanato.

“Si Kristo ang Hari, lahi siya nga pagkahari kay siya puno sa gugma alang kanatong tanan,” kini ang mga pulong ni Bishop Aseo. Midugang ang Obispo sa pagpasabot nga ang Diyos Amahan mihatag sa iyang Bugtong Anak aron moluwas sa katawhan sa mainantusong pamaagi. Miingon sab ang Obispo nga gusto sa Amahan nga pasayloon ang mga sala sa tanang tawo kay mao kini ang iyang tuyo. Kini tungod kay ang Diyos kay mahigugmaon kanatong tanan.

Gipasabot usab ni Bishop Aseo kung nganong wala man gipakita ni Hesus ang iyang gahum isip Dios samtang didto siya sa krus, kung nganong wala siya nanalipos sa iyang kaugalingon. Sumala ni Bishop Aseo, kung atong sabton gihulagway kini ni Apostol San Pablo nga pinaagi sa bugtong anak sa Diyos Amahan kita mapasaylo ug mangaluwas.

Gihatgan usab ug gibug-aton sa Obispo nga, “ang gugma ni Kristo alang kanato, tinood ug walay katapusan, walay utlanan. Gipamatud-an kini sa mga panahong gisagupa sa anak sa Diyos ang mga kalbaryo nga kung asa, iyang gisakripisyo ang iyang sarili ug ang iyang kaugalingon mao nang makaingon kita sa atong mga sarili nabulahan kitang tanan kay gihiguma kita”. (Ranel Padayon, Jr. and Wilm Astillo)