Balaanon sa Dios ang matag banay

Feast of the Holy Family
Sir 3:2-6, 12-14 / Ps 128:1-2, 3, 4-5 / Col 3:12-21 / Matt 2:13-15, 19-23

Malipayong Pasko kanatong tanan! Matag tuig, human sa adlaw gayod sa Pasko sa Pagkatawo sa atong Ginoo, atong ginasaulog sa Domingo nga mosunod, ang Pangilin sa Sagrada Pamilya ni Hesus, Maria ug Jose. Kining panan-awon tataw natong mahandum pinaaagi sa gitawag natong Belen.

Dinhi atong masud-ong ang gihisgutan sa atong Ebanghelyo diin ang Mahal nga Birhen, Inahan ni Hesus ug atong inahan, nahimong sulondon sa pagkamasinugtanon. Siya mituman sa sugo sa Amahan aron matuman ang plano sa Ginoo sa kaluwasan sa katawhan. Siya namalandong kanunay ug nagpahimo sa Manunubos nga makita sa tanang katawhan ug masud-ong sa matag binuhat.

Sa iyang kilid makita nato sa San Jose nga nanalipod sa batang Hesus ug sa Mahal nga Birhen nga atong Inahan. Siya nagbitbit og sungkod. Siya kanunay nag-atiman sa Balaang Banay bisan sa ilang pagkagiw ngadto sa Ehipto hangtod nga namatay si Herodes. Iyang gibati ug gipuy-an ang misteryo sa kaluwasan pinagi sa pagsugot sa misyon nga gisangon kaniya sa Amahan taliwala sa dagkong mga hagit.

Ang Batang Hesus nga natawo sa pasungan, nagpadayag sa rebolusyon sa gugma ug kalumo. Sa iyang pagpaubos, ang Dios nga nahimong tawo ug gisalikway, nahimong kalig-on sa mga tinamay ug sa mga gipadaplin. Siya nakig-uban sa atong kahuyang ug naglig-on kanato. Nakighiusa siya uban kanato. Siya dunay pagbati kanato ug mipuyo sama kanato gawas sa sala.

Niining maong hulagway, napuy-an gayod sa Sagrada Pamilya ang pagkapinili sa Dios, pagkabalaan ug pagka-pinalangga. Naghari sa matag usa kanila ang kaayo, pagpaubos ug pasensiya. Nagpakita ang matag usa sa pagtahod ug pagrespeto. Tungod kay naghari ang pagpasaylo, nalukop sila sa pagsinabtanay ug kalinaw. Sila kanunay mapasalamaton sa Ginoo ug sa usa’g usa tungod sa pulong sa Ginoo nga gitamod nila. Nagdayeg sila kanunay sa Ginoo.

Manghinaut kita nga taliwala sa kahuyang sa atong matag pamilya, madasig kita sa panig-ingnan nila. Mosalig kita sa grasya sa Dios aron mabalaan ang matag banay.