Talagsaong gasa sa pagka-Pari

“Ang pagka-Pari mao ang pagpuyo sa langitnong kinabuhi dinhi sa kalibutan. Busa usa kini ka gasa ug usa ka hagit, Usa ka talagsaong gasa nga gihatag sa tinawag ug pinili nga mahimong ministro sa Sakramento. Ug ang hagit mao ang pagpabiling matinud-anon sa maong gasa”.

Kini ang gipaambit ni Rev. Fr. Donie M. Emuy, ang bag-ong na ordinahan nga Pari sa Diocese of Mati, sa iyang Misa-pasalamat.

Si Rev. Fr. Donie M. Emuy, nag-exposure isip seminarista, sa Parokya sa St. Mary of the Perpetual Rosary sa Buhangin, Davao City niadtong November 2017 hangtod February 2018. Dose ka adlaw human sa iyang ordinasyon sa pagkapari sa Mati, nibalik siya sa parokya aron magpasalamat sa Kura Paroko ug mga Parokyano, ilabina sa parish leaders ug youth nga nakatabang sa iyang pormasyon isip bag-ong Pari sa Diocese of Mati.

Ang mga batan-on nga iyang nakauban panahon sa iyang exposure nagpadayag nga ilang kanhing kuya reverend, karon usa ka kuya reverend father na.

Gipahigayon ang Thanksgiving Mass ni Rev. Fr. Donie M. Emuy niadtong Domingo, November 10, 2019 sa alas 8:00 sa buntag. Iyang MC si Seminarian Esper Manginsay sa Diocese of Zamboanga, ang bag-ong seminarian nga na assign mag-exposure dinhi sa naasoy nga parokya isip kabahin sa iyang pormasyon nga programa sa Regional Major Seminary (REMASE).

Mapasalamaton ang mga pangulo sa matag ministriya nga nitambong sa maong Santos nga Misa ug ubang parokyano sa pagbalik si Fr. Donie aron magpasalamat ug padayonon ang pag-ampo aron molahutay siya sa iyang gidawat nga bokasyon sa pagkapari diin usa siya sa gitawag sa Dios aron magpadayon sa iyang misyon dinhi sa kalibutan. Congratulations Fr. Donie! (Hermie Mapute | SMPRP SoCCom)